Parlamentario Marisol Lopez-Tromp(POR): ‘Ta importante pa e Fondo di Social Crisis Plan continua’

Lider di Fraccion di POR, Marisol Lopez-Tromp papiando di e Sociaal Crisis Plan a bisa cu Parlamento a aproba esaki pasobra e ta necesario pa yuda e muchanan , nos famianan y pa tin e siguridad pa e muchanan cu ta wordo abusa y maltrata.

Lopez-Tromp a scucha declaracionnan di Minister di Finansa cu a elabora riba e motibonan pa cual Minister di Asuntonan Social a biaha pa Hulanda pa papia riba e Sociaal Crisis Plan y por a scucha tambe e mandatario di Finansa bisa cu e suma pa esaki ta bin adicional na loke a wordo palabra caba di presupuesto y relaciona cu esaki tin discusionnan andando cu CAFT.

Den nomber di Fraccion di POR, Marisol Lopez-Tromp a bisa cu por compronde e discusion cu ta mas bien riba e parti financiero, pero mester keda corda e meta pa cual e Sociaal Crisis Plan a wordo aproba. P’esey e ta haya importante cu e minister concerni a bay duna mas splicacion na Hulanda y a reuni tambe cu esunnan di CFT, pero lo desea di haya sa den un forma mas detaya e resultado di esaki.

“Importante ta pa e Fondo di Sociaal Crisis Plan continua pasobra e ta toca e fundeshi di nos comunidad, e futuro di nos muchanan, nos famianan. Sin esaki no tin futuro, tin muchanan cu ta pasa den maltrato of cu ta biba den peliger y no por yuda nan manera cu bo kier. Ni maske cuanto miyon bo tin presupuesta pa otro topiconan, e topico aki ta keda importante, pasobra no ta e parti social so, e ta toca diferente otro cartera. E ta toca por ehempel e cartera di husticia, salud y educacion tambe. Kiermen diferente ministerio mester traha hunto pa hacie un realidad”, Marisol Lopez-Tromp a duna di conoce.