Ayera, Parlamentario di Fraccion MAS, Marisol Lopez Tromp a duna su punto di bista tocante e comentarionan haci recientemente pa minister di Finanzas y Cultura, Xiomara Maduro (MEP) unda el a indica cu e trato cu gobierno a ricibi di Hulanda den e negociacionnan pa refinanciamento di prestamonan di Covid por wordo considera como “forma nobo di esclavitud.”

Den un video publica riba su rednan social, Lopez Tromp a cuminsa bisando: “Den e dianan aki, no ta un secreto cu varios minister di Gabinete Wever-Croes ta na Hulanda pa bishitanan di trabao. Nos a mira varios partinan den noticia caminda nan tin reunionnan, fiestanan, encuentronan, y tambe naturalmente bo por bisa partinan caminda nan ta duna entrevista y duna informacion riba nan opinionnan.”

Declaracionnan contradictorio

Lopez Tromp ta bisa cu loke ta resalta p’e ta cu “mayoria bes cu tin negociacionnan cu Hulanda, y caminda cu ta papia di e parti financiero, mayoria bes ta minister president ta papia riba e topico aki, y no e minister di finanzas.” Pa ilustra esaki, e video ta mustra un clip den cual por observa prome minister, Evelyn Wever-Croes den conferencia di prensa hunto cu minister Maduro, unda Maduro ta cuminsa papia y Wever-Croes ta interumpie bisando “ami mes ta contesta,” pa loke Maduro ta punta riba Wever-Croes y ta bisa, “min pres ta contesta bo.”

Lopez Tromp ta continua: “E biaha aki nos por a mira minister di Finanzas hiba un discurso y despues di esaki splica un ke otro y duna su opinion,” referiendo na e discurso di Maduro na e encuentro di Genootschap Nederland-Aruba na Den Haag, tocante cual Bon Dia Aruba a publica un articulo den nos edicion di ayera. “Nos ta mira cu di un banda semper minister presidente ta gaba, te cu ultimo aki, cu su relacion cu Hulanda ta bon. Cu e reunionnan ta tuma lugar den un forma critico, skerpi, pero cu tin respet mutuo. E ta enfatisa cu nan por dialoga riba un nivel halto, y e ta trece pa dilanti no obstante tur discusion cu por tin, nan ta respeta otro.” Sinembargo, Lopez Tromp ta nota cu “e biaha aki cu minister di Finanzas a papia aya na Hulanda, el a duna un imagen totalmente contrario.”

Segun Lopez Tromp, comentarionan di Maduro ta pone mustra como si e ta sinti cu “practicamente e ta sclavisa den un forma con e ta wordo trata pa cu e temanan aki.”

“Y tambe el a expresa diferente puntonan caminda e ta menciona, y esnan cu a bin cune y a bay cune tambe Hulanda, cu tin un kiebro di confiansa,” Lopez Tromp a continua. Den su opinion, e comentarionan di e personanan aki ta mustra cu e situacion a cambia y cu no tin respet pa nan. “Kico a cambia den corto tempo?”

Lopez Tromp ta recorda cu “recientemente” Wever-Croes tabata na New York “practicamente brasa” cu prome minister Hulandes, Mark Rutte y Secretario di Estado Hulandes, Alexandra van Huffelen, “y nos ta mira awo’ki Xiomara na Hulanda den un conflicto, y den un situacion cu ta expresa totalmente lo contrario, hasta bisando cu pueblo asina ta perde confiansa den loke ta sucediendo eynan.”

Bon Dia Aruba a tuma contacto cu prome minister Wever-Croes pa puntra si e declaracionnan di Maduro en cuestion lo afecta su negociacionnan andando cu Hulanda, pero te ciere di redaccion, no a ricibi ningun contesta di e mandatario.

Fondo publico pa mercadeo

Pero segun Lopez Tromp, maske pueblo si ta perde confiansa, “pero den dje. Pueblo masha dia a perde confiansa den dje.” Y mirando e expresionnan cu Maduro a haci na Den Haag, segun su opinion, ta di compronde pakico normalmente Maduro no ta bay haci e negociacionnan aki. “Pueblo a perde tanto confiansa den dje, cu ta hopi importante p’e pa e tin un bon mercadeo, pa e splica cada bes kico ta pasando, y pakico e ta hinca den e situacion aki. Hopi placa ta bay na mercadeo.”

“Nos ta mira tambe den tur su publicacionnan ora e ta informa nos pueblo por medio di Facebook – cual mayoria politico ta haci uso di dje – caminda cu loke ta trece padilanti no tin mucho contenido riba e topico financiero. Al contrario, nos ta mira hopi otro tipo di informacion cu no ta toca e esencia di su cartera, e esencia pa cual el a wordo scogi, y naturalmente e responsabilidad cu e como mandatario tin cu carga pa e cartera aki di Finanzas.” Ademas, Lopez Tromp a comenta riba e actitud general di e mandatario, bisando cu “ora e bin den Parlamento, mas tanto ta conflictivo, acusando otronan, pagando pa videonan pa ataca opositornan politico – entre otro pa ataca mi persona como parlamentario – pagando pa haci un mercadeo mas grandi posible pa yega mas tanto hende posible pa duna nan informacion negativo riba e parlamentarionan den parlamento cu e ta sinti cu no ta sosten’e.”

Lopez Tromp ta cuestiona e gasto aki, bisando “y awe pueblo por wak y puntra su mes si tin tanto placa pa haci esaki, si tin tanto placa pa inverti den un mercadeo cu no ta ilustra e realidad, anto claro cu pueblo tin cu perde confiansa den dje.”

Lopez Tromp ta recalca e punto di bista contradictorio entre Wever-Croes y Maduro. “Loke nos a mira expresa awe no ta solamente bisando cu e tin dificultad cu e reunionnan y den e reunionnan y cu e forma cu e ta wordo trata, pero e ta mustra tambe unda e coherencia ta entre e dos ministernan aki,” el a bisa. “Minister president un banda, gabando cu tin nivel, respet, ta bayendo bon, ni maske nan ta den discusion nan ta papia di contenido; y di otro banda nos ta wak minister di Finanzas conflictivo, a bisa cu no tin confiansa, falta di respet, y hasta ta menciona cu e ta sclavisa.”

Segun Lopez Tromp, esaki ta causa confusion entre pueblo. “Nos ta puntra nos mes, unda e unidad di maneho a keda?”

Forma nobo di sclavitud
 Interesantemente, Lopez Tromp a compaña su video cu un texto indicando cu “Un “esclavo moderno” na Aruba por ta un persona cu ta traha bao condicionnan inhusto, cu salario minimo of sin salario, sin derecho laboral adecuado, y cu ta sinti obliga pa keda den e trabao debi na falta di alternativa, presion financiero, of manipulacion psicologico. E situacion aki ta viola e derecho humano basico y ta refleha un forma di explotacion laboral.”