Mediante un publicacion riba rednan social, parlamentario di partido MAS, Marisol Lopez-Tromp a expresa cu ayera pa di 4 biaha a pidi un reunion publico cu minister di Labor, Energia y Integracion, Glenbert Croes, caminda e parlamentarionan por trece nan mocionnan.

Esaki ta debi cu Lopez-Tromp ta sigura cu minister Croes su maneho pa inmigracion no tin transparencia riba su proceduranan.

“Publicacionnan den media di diferente minister di Gabinete Wever-Croes ta haci expresionnan cu ta contradeci otro, y cu un minister president cu ta hunga ciego den cierto caso cu cosnan ta bayendo robes,” el a indica.

Ademas, el a bisa cu su fraccion hunto cu fraccion di AVP diaranson 14 di februari a pidi ya pa di 4 biaha desde aña pasa pa minister Glenbert Croes bay Parlamento di Aruba pa responsabilisa riba su maneho den un reunion publico, caminda cu nan como parlamentarionan por tin un debate publico y por trece mocionnan.

Tabata dia 15 di februari di 2023 tempo cu Lopez-Tromp su fraccion conhuntamente cu fraccion AVP a solicita na presidente di parlamento, Edgar Vrolijk pa minister di Labor, Energia y Integracion asisti na Parlamento di Aruba pa informa e parlamentarionan detayadamente tocante e enfoke pa e politica di inmigracion. “Ta hopi importante pa e minister splica loke ta nifica su enfoke pa tur persona cu di un of otro forma ta depende di e procedura aki, cu durante añanan a bin describiendo como ineficiente, poco transparente y frustrante,” e carta di 15 di februari 2023 tabata indica.

Ta p’esey cu nan a pidi e reunion publico cu minister Croes cu e siguiente punto di orden di dia: “Politica di inmigracion ineficiente, poco transparente y frustrante di Gabinete Wever-Croes II y nan consecuencianan pa tur hende involucra.”

Dia 16 di maart 2023 a bolbe haci e mesun peticion; dia 8 di mei 2023 y 14 di februari 2024, un aña despues, tanto Lopez-Tromp como Aquannette Gunn y Mervin Wyatt-Ras di fraccion di AVP a solicita un biaha mas e mesun reunion cu minister Croes.

Maske nan tabata solicitando un reunion publico (Openbare Vergadering), loke e fraccionnan aki a haya dia 27 di juni 2023 tabata un encuentro publico (Openbare Bijeenkomst), loke Lopez-Tromp a sigura cu pa nan ta nifica cu no por presenta mocion ni debati cu e minister concerni.

E dia ey, minister Croes a comparti e Handboek Toelating 2023. “Mi a haci pregunta entre otro, tocante depolitisacion di DIMAS, impacto di tur e hotelnan pendiente y e Carrying Capacity, e chens pa esnan cu bijstand cu ta solicita pa trabao, etc. Segun Minister Glenbert Croes, tin hopi mas trabao cu tin trahado .”

Ta bay crea plataforma di guia y asistencia pa stranheronan

Mientras tanto, minister Croes dia 7 di februari ultimo a anuncia cu su ministerio di Integracion hunto cu Asociacion di Cuerpo Consular di Aruba (ACCA) ta bay crea un plataforma di guia y asistencia pa ciudadanonan stranhero “cu por sigura un servicio humano y husto pa e comunidad stranhero, cu tin e deseo di bin forma un hogar aki na Aruba,” manera e comunicado di prensa ta indica.

A informa cu minister di Integracion, Glenbert Croes hunto cu su conseheronan huridico tabata presente na un presentacion di e Asociacion di Cuerpo Consular na Aruba, caminda e evento aki presenta pa Sra. Solangel Lacle, a ser yama e proyecto aliansa, y a enfoca riba e posibilidad, pa tur e consuladonan na Aruba y esnan den Caribe Hulandes, traha hunto cu Ministerio di Integracion, pa crea un plataforma di conseho, guia, asistencia, y apoyo na e henter e comunidad stranhero cu ta biba na Aruba.

Un di e preocupacionnan cu a trece dilanti, ta e hecho cu tin hopi ciudadano stranhero na Aruba cu ta mal conseha, of ta kita placa di nan pa asina por tramita nan documentonan pa permiso. Pa evita e casonan aki den futuro, kier bin cu un plataforma, na unda Ministerio di Integracion hunto cu e consuladonan lo traha hunto pa asina conseha, guia, y duna asistencia na e ciudadanonan stranhero aki, pa na un manera legal y sin problema por yega na nan permiso.

“A traves di e trayecto di integracion responsabel cu tin, y e necesidad riba mercado laboral pa trahadonan, lo duna preferencia na tur local prome y na tur ciudadano stranhero cu a drenta Aruba legalmente. Mirando tur e proyectonan, pa loke ta e zona di refineria, cu lo bay bin, lo bay tin e necesidad di trahadonan responsabel y di bon boluntad. E ciudadanonan stranhero cu a yega Aruba di un manera responsabel y legal, y cu tin respet pa e pida baranca aki, ta loke e mercado laboral mester, y pa e motibo aki, Aruba ta dispuesto pa brinda nan e oportunidad pa labora akinan, y asina forma hunto cu nan famia, un miho bida na Aruba,” e comunicado a bisa.