Mediante un publicacion riba su red social, parlamentario di partido MAS, Marisol Lopez-Tromp a expresa cu pa di 4 biaha a pidi un reunion publico cu minister di Labor, Energia y Integracion, Glenbert Croes, caminda e parlamentarionan por trece nan mocionnan.

Esaki ta debi cu Lopez-Tromp ta sigura cu minister Croes su maneho pa inmigracion no tin transparencia riba su proceduranan.

“Publicacionnan den media di diferente minister di Gabinete Wever-Croes ta haci expresionnan cu ta contradeci otro, y cu un minister president cu ta hunga ciego den cierto caso cu cosnan ta bayendo robes,” el a indica.

Ademas, el a bisa cu su fraccion hunto cu fraccion di AVP, diaranson 14 di februari a pidi ya 4 bes desde aña pasa pa minister Glenbert Croes bay Parlamento di Aruba pa responsabilisa riba su maneho den un reunion publico, caminda cu nan como parlamentarionan por tin un debate publico y por trece mocionnan.

Tabata dia 15 di februari di 2023 ora Lopez-Tromp su fraccion conhuntamente cu fraccion AVP a solicita na presidente di parlamento Edgar Vrolijk pa minister di Labor, Energia y Integracion asisti na Parlamento di Aruba pa informa e parlamentarionan detayadamente tocante e enfoke pa loke ta trata e politica di inmigracion. “Ta hopi importante pa e minister splica loke ta nifica su enfoke pa tur persona cu di un of otro forma ta depende di e procedura aki, cu durante añanan a bin describiendo como ineficiente, poco transparente y frustrante.” E carta di 15 di februari 2023 tabata indica.

Tambe a bin dilanti un otro reaccion di su persona pa loke ta trata un articulo cu a sali den otro medio di comunicacion cuestionando minister Croes su maneho pa loke ta trata migracion na unda a base di esey el a manda preguntanan por escrito tanto pa pidi e reunion pa di cinco biaha como pa puntra na minister di Labor, Energia y Integracion tocante e articulo menciona caba.

“Cuanto bes Minister Glenbert Croes a benta conseho di DIMAS of otro departamento/ directie un banda, y haci loke e kier, esta firma pa cierto permisonan di cual e conseho no ta positivo? Esaki no ta cu DIMAS so sino cu mas departamento/ entidad cu ta resorta bou su cartera. Ki bal tin procedura y ‘good governance code’, ‘vier ogen principe’, ‘depolitisacion’, landspakket cu reformanan, etc., si no ta importa Gobierno manca su mesun ” integridad” gubernamental?”Lopez-Tromp a sigura.