Parlamentario Marisol Lopez Tromp di partido MAS a haci entrega di un serie di pregunta, relaciona cu e situacion na empresa estatal WEB Aruba NV, entre otro tocante e retiro recien di dos director na e entidad aki. E preguntanan via presidente di Staten ta dirigi na Promer Ministro Evelyn Wever Croes, pa cual ta pidi contesta por escrito.

Pregunta haci pa miembro di parlamento ta referi semper na articulo III.17 di Staatsregeling (Constitucion) di Aruba y ta referi tambe na conformidad cu articulo 59 di Reglement van Orde di Staten di Aruba.

Primeramente e parlamentario ta pidi si parlamento por haya copia di e corespondencia entre Utilities Aruba NV (NV propietario directo di WEB Aruba NV), y gerencia di WEB, tocante e terminacion di e contrato cu e dos directornan di WEB. Igualmente e carta di Utilities, den cual a informa e directornan di e motibonan cu a conduci na falta di confianza y na termina nan contrato; tambe e contesta di e directornan di WEB riba e notificacion aki.

Seguidamente ta puntra cual ta e condicionnan den e contrato di trabao di e directornan pa terminacion di e contrato y cual tabata e acuerdo final cu e directornan. E parlamentario ta referi na e hecho cu Prmer Ministro lo a indica cu a yega na un acuerdo nas faborable cu loke ta poni den nan contrato y ta puntra kico esaki ta encera y den ki sentido esaki ta mas faborable.

Lopez Tromp kier sa tambe ta cuanto e terminacion di contrato aki a costa WEB, y finalmente Pais Aruba, y kico tabata e bentaha di e terminacionnan aki. Tambe ta haci e pregunta con mester interpreta e hecho cu Utilities a retira e directornan pa falta di confianza, y pakico anto nan mester haya recompensa pa esaki.

E parlamentario ta relaciona e asunto tambe cu e vigilancia cu Hulanda lo ta hibando den e tipo di asunto aki, y ta puntra si e Promer Ministro si e asunto aki no por “pone Hulanda rabia”, y ta referi na e acuerdo firma entre WEB y sindicato SIWA, den presencia di entre otro mediador di gobierno y presidente di Hunta di Comisario, cu tambe a lanta iritacion di Hulanda.

Tambe e parlamentario a referi na e asuntonan cu lo a crea un desconfianza entre sr. Richard Eman (director Utilities Aruba NV) y e dos directornan di WEB. Entre nan ta menciona e contrato di 700 miyon florin, cu a firma pa refinancia y financia proyectonan di WEB, Elmar y Utilities un par di aña pasa, cu envolvimento di un compania (local; red.). Y si Staten por haya informacion ta kico e diferencia di opinion aki ta encera.

Den e cuadro aki ta haci e pregunta si Staten por haya copia di e evaluacionnan cu a haci e tempo ey pa establece si esaki tabata e mihor alternativa pa e fianza grandi aki.

Contrato Eagle LNG

Parlamentario Lopez Tromp a atende cu su preguntanan tambe e contrato cu lo ta negociando actualmente cu e compania Mericano Eagle LNG, pa suministro di gas natural na WEB, pa reemplaza e Heavy Fuel Oil (HFO) cu te awor ta ser usa pa produci gran parti di e energia electrico na WEB, fuera di e produccion di awa. E parlamentario ta puntra si e Promer Ministro por informa Staten kico tabata e diferencia di opinion entre e director di Utilities y e dos directornan di WEB riba e topico aki. Tambe si Staten por haya informacion riba e valor di e contrato ey y kico lo ta e condicion y terminonan na cual WEB lo ta mara.

Alavez Lopez Tromp ta sugeri pa laga un tercer partido haci un evaluacion di e contrato y di e proceso pa yega na un contrato di e magnitud aki y duna Pais Aruba un recomendacion den e asunto aki. Refiriendo tambe na e introduccion pronto di COHO como instancia supervisor, e parlamentario ta haci e pregunta si no lo mester warda pa COHO haci nan “integrale doorlichting” manera stipula den e Landspakket, capitulo B.2, promer cu eventualmente cera un contrato di e magnitud ey. Atrobe e parlamentario ta referi na e posibilidad di no haci “Hulanda rabia”.

Tambe e preguntanan ta toca e tema di e asunto di un solo director cu di awor en adelante lo maneha WEB (y Elmar). Ta puntra kico ta e plannan concreto pa realisa esaki, y si e plan ta cu e director recientemente nombra na Elmar lo por haci esaki.

Finalmente e parlamentario a toca e asunto di e salario di e proximo director, cu lo ta segun e asina ‘Wever Croes norm’ (130% maximo di e salario actual di Promer Ministro). E parlamentario ta haci e pregunta kico esaki ta encera concretamente.

Nota di redaccion:

E preguntanan di e parlamentario a trece varios asunto valido dilanti, pero no a toca ainda un di e puntonan strategico mas importante di e eventual contrato cu Eagle LNG, y esey ta e factibilidad di uso di LNG na Aruba, na un manera competitivo y rentable. Aki segun Bon Dia Aruba tin hopi pregunta pa haci, y contesta, pa esaki no bira e siguiente debacle financiero pa Aruba.

E ultimo pregunta ta parce relaciona cu e discusion cu tabatin algun tempo pasa, tambe den Bon Dia Aruba, tocante e componentenan di e salario. Concretamente e debate tabata si mester a inclui tambe e provisionnan pa pension cu, di un banda e mandatario y di otro banda e dirigentenan di e entidadnan estatal, ta goza. Di banda di gobierno a keda insisti cu ta trata solamente di e nivel di salario.