Mediante un video publica riba su rednan social, e parlamentario di partido MAS, Marisol Lopez-Tromp ta enfatisa cu algun camindanan na Aruba ta den hopi mal estado y cu gobierno mester a percura pa tin un fondo special pa esaki.
“Camindanan cu a drecha algun par di aña pasa ya ta nawerki, pero manera cos ta mustra cu gobierno ta colgando den un hilo, nos ta mira un situacion cu di repenti, gobierno a bira Sinterklaas, no ta un secreto cu gobierno su placa pa caretera ta keda baha esaki den transcurso di añanan unda masha poco cen tabata resta pa inverti den drecha nos camindanan, mientras cu pueblo, a bo, pagado di belasting ta paga tambe pa drecha nos camindanan na Aruba,” e parlamentario a señala.
Faltando menos cu un aña pa tempo di eleccion, “pero manera cos ta mustra, gobierno ta colga den un hilo, cu careteranan cu mester drecha nan ta bisa nan, skirbi esaki y duna bo opinion, y nos ta mira tambe cu hasta ministernan ta priminti cu miyones lo bay aworaki pa drecha careteranan rond Aruba, pero e realidad ta cu no tin un maneho structural cu tanto placa fiho pa aña ta bay pa careteranan,” el a sigura.
Hopi tempo pasa, ora Lopez-Tromp tabata minister di Infrastructura, manera e mes a sigura, a percura pa lanta un fondo di caretera, “institui un fondo pa caretera ta nifica pone placa specificamente pa drecha nos camindanan rond Aruba, asfalta camindanan cu ta di santo, drecha areanan cu ta peligroso y naturalmente percura pa den tur bario tin un caminda bon pa nos auto nan por core sigur riba dje y pa asina tambe evita accidentenan of percura pa tin un trafico eficiente,” e ta señala.
Ademas, Lopez-Tromp a bisa cu tur aña tabatin miyones florin poni pa drecha careteranan den un forma structural y aworaki di repenti, faltando poco pa eleccion, “nos ta wak cu gobierno ta bisa cu tin placa pa drecha careteranan pero esaki ta nifica cu mañan si, mañan no , kisas otro dia, esaki ta nifica cu si no tin placa pe den presupuesto, e no ta bay door, loke mester pasa ta cu gobierno mester percura pa tur aña por sigura cu ciudadanonan su placa, cu ta pagado di belasting, lo bay un gran parti pa e red di infrastructura, pa bo pais, pa bo economia esaki ta importante, e ta importante pasobra e lo percura tambe pa tin trabou pa esnan cu ta traha den area aki cu por gana nan pan di cada dia drechando y yudando nos careteranan aki na Aruba.”
Segun Lopez-Tromp su opinion, esaki tambe ta nifica inversion den mesun companianan local, si ta scoge companianan di Aruba mes, pa haci e trabou aki companianan cu por confia riba dje, cu e departamentonan necesario pa por percura pa tin un trabou bon haci “pasobra kico nos ta mira aworaki? Camindanan cu a drecha un of dos aña pasa ya ta na werki, nos ta wak un maneho di gobierno cu ora cu tin bishita importante di exterior, e ora si ta bay wak cua rutanan tin cu drecha prome cu nan yegada, esaki no ta plania, e ta sosode pasobra tin un bishita of algo ta sucede importante riba e ruta ey, pero si gobierno ta percura pa cada aña tin placa suficiente, por ehemplo e placa di nummerplaat cu ta relaciona cu nos autonan, e fondo ey ta dirigi pa drecha camindanan, si bo no kier haci esey como gobierno, percura pa bo tin un fondo special pa nos careteranan,” el a bisa.
Bon Dia Aruba ya caba a yega di publica e estado di varios caminda cu ta den hopi mal estado, na unda turistanan ta pasa tur dia, manera esun di Malmok, ademas Lopez-Tromp a sigura cu tambe tin problemanan di riolering specificamente dilanti Divi Phoenix, cu ta camindanan hopi bieu y kibra “claro cu ta un trabou cu ta tuma añanan pero si como gobierno bo a percura pa pone un fondo special, aworaki practicamente di tanto aña pasa pa awor, nos lo tabatin Aruba mucho mas den condicion pa loke ta nos careteranan,” el a finalisa.
Den edicion di 26 di januari, redaccion a trece e problematica aki dilanti, por ehemplo, na Tanki Flip, unda un busto di Betico por ser aprecia dilanti dje, un pida di caminda yen di buraconan unda tur dia chauffeurnan mester tin un lucha pa por pasa cu nan auto den parti aki, e ta yena cu awa ora ta yobe y ta bira pio y ademas e buraconan cu tin basta tempo caba ta dorna e luga cu autonan te hasta tin cu bira un auto di off-road pa por atravesa e pida aki.
Mediante un comunicado di prensa, Gobierno di Aruba a informa cu prome minister Evelyn Wever-Croes ken ta encarga cu maneho di Infrastructura, den Parlamento di Aruba a papia tocante e presupuesto di aña 2024 pa Dienst Openbare Werken (DOW).
“Manera ta conoci, DOW ta un compania estatal cu su mesun presupuesto, cu tin e vision pa sigui traha na mehora e servicio na comunidad, na percura pa e mantencion di obranan publico ta “up to date”, percura cu e trabounan ta wordo monitoria y pa no warda te ora cu bin keho di ciudadanonan pa haci e trabou. Tambe, internamente DOW ta trahando pa finalisa e re-organisacion, y e digitalisacion di e departamento. Prome Minister a indica cu tin 10.4 miyon florin pa drecha caretera den 2024,” e comunicado a indica.
