Marisol Lopez, parlamentario lider di fraccion POR y presidente di Comision di Salud den Parlamento, a haci un declaracion pa Bon Dia Aruba tocante e cambionan di ley cu mester tuma luga pa e seguro AZV cuminsa cubri e gastonan di pashent cu diferente malesanan.
Lopez a señala cu AZV ta un ley cu a pasa na aña 2001, e tempo ey tabata otro situacion pa cu awo, di loke ta trata infrastructura, malesanan y tur esey. El a splica cu gobierno y minister actual ta revisando e ley, nan como parlamentario a pidi esey pa varios factor, di cual e asunto di malesanan di higra y transplante ta un di nan, asina tambe como tin otro aspecto cu tin peticion riba nan, como por ehempel, e parti preventivo.
Asina tambe el a splica cu e cambio di ley a ser pidi pa aspectonan cu tin mas malesanan of asuntonan cu ta pidi cambio, p’esey mester presenta na Parlamento pa por adapta e ley actual, y pa esey sosode, mester pasa full un proceso pa yega na bon conseho y pa por trece un proyecto di ley nobo cerca Parlamento.
Lopez a manifesta cu esey ta un proceso di busca advies cu no ta legal so, y pa tur esey nan a yega di pidi den un reunion hunto cu AZV, cual a tuma luga lunanan pasa, den cual nan a papia di e eventual cambionan cu mester bin den e ley, y tambe pa malesanan cu no tin hopi caso na Aruba.
Di e forma aki, nan a haya un bista di kico gobierno ta bezig pa bay revisa hunto cu minister y AZV, kico ta e proposicion cu nan ta bay sugeri pa e cambio di ley. Pa finalisa el a expresa cu e ley ta den full un proceso pa revisa.
