Recientemente, parlamentario di partido Movimiento Electoral di Pueblo (MEP) Marco Berlis, a bin treciendo dilanti informacion tocante introduccion di un ley nobo di referendum den Parlamento di Aruba, cual ta bay ta diseña pa duna pueblo un herment pa participa den decisionnan importante, manera el a sigura.
Den un entrevista cu redactor di Bon Dia Aruba a tene cu Marco Berlis el a declara cu for di aña 1986 Constitucion di Aruba no conoce un referedum, ta existi un caba hancra den Constitucion pero esey ta pa Aruba bira independiente di Hulanda, si e ciudadanonan un dia lo dicidi esey e referedum t’ey pero pa loke ta trata otro temanan “sensitivo” manera cambionan constitucional of institucional, asuntonan di medio ambiente y temanan social of cultural, esey no ta existi.
El a splica cu “esaki no ta dirigi pa ataca gruponan specifico den comunidad sino cu ta algo hopi mas grandi, ta algo pa empodera pueblo,” el a bisa.
Berlis ta señala cu tin ciudadanonan cu ta cuestiona cierto decisionnan di gobernacion “pero pa e mesun motibo ey nos tin eleccion, unda bo ta empodera representantenan di pueblo cu ta controla gobierno, controla presupuesto, cuestiona temanan, kiermen nos tin caba un organo cu ta haci e trabou ey. Pero hopi biaha riba topiconan sensitivo pa pueblo, bo no ta haya e politiconan pa vocifera riba e temanan aki. Nan ta lag’e su so, nan no kier touch e pasobra nan no kier ofende ni un hende. Mi ta kere cu den topiconan aki ta hopi importante pa pueblo por expresa su mes,” el a declara.
Pa por trece esaki dilanti, Berlis a indica cu el a bay sondea y a ripara cu no tin un ley di e forma aki unda el a cuminsa cu e proceso di un ley di referendum cual a dura mas di un aña pa nan por a hink’e den otro, e meta ta pa hancr’e den constitucion “pasobra nos kier pa e bira un derecho fundamental di pueblo, manera Corsou y Sint Maarten tine. Un poco diferente di otro, pero nos a tira un bista riba nan y nos a trata di usa ingredientenan di eynan pa wak kico nos ta pensa cu ta bon pa Aruba. E ta den linea di lo cual tin den Reino caba,” el a sigura.
E ley aki a ser entrega dia 19 di augustus ultimo na Raad van Advies na unda ta permanece na e momentonan aki, Berlis ta spera cu nan por hay’e pronto back pa nan por haya conseho y e ley por sigui su caminda “naturalmente no lo keda cla cu full e trayecto cu tin mester prome cu eleccion, nos no tabata sa cu eleccion ta bay bin asina lihe, pasobra mi speransa tabata ta pa prome cu eleccion nos por a trat’e den un reunion publico.
Pa politiconan trece su comentarionan of si algun lo kier haci cambio, nos mente ta habri pa dialoga, pa cambionan y mi ta kere cu e ta importante pa e tin e input di otro coleganan tambe,” Berlis a declara.
Pa loke ta trata beneficionan y impacto di e ley di referendum Berlis a informa lo siguiente:
1. Participacion directo: E pueblo lo por expresa nan opinion directamente riba temanan crucial, creando un conexion mas fuerte entre gobernacion y ciudadanonan.
2. Transparencia: E proceso di referendum ta stimula un debate publico mas amplio y informativo, loke ta resulta den un toma di decision mas transparente.
3. Responsabilidad: Politiconan lo mester ta mas atento na e deseonan di pueblo, sabiendo cu cierto decisionnan por ser someti na un voto popular.
4. Educacion civico: Referendumnan ta stimula ciudadanonan pa informa nan mes miho riba asuntonan nacional, elevando e nivel di conocemento politico den comunidad.
5. Legitimidad: Decisionnan tuma via referendum tin un nivel halto di legitimidad, ya cu nan ta refleha directamente e boluntad di pueblo.
Berlis tambe a papia tocante e proceso di e ley cual nan kier logra hancr’e den constitucion pa e bira un derecho fundamental, siguientemente mester traha un Landsverordening unda eynan lo specifica tur e detaye di con e referendum lo tuma luga.
“E ta bay tuma luga mas tanto manera un eleccion normal, cu e mesun set up, mi tin algun ideanan y sugerencia con esey lo por tuma luga. E structura ta bay ta cu e mesun urnanan, diferente localidad y districtonan. Tambe lo sinta cu diferente stakeholders y coleganan cu lo ta interesa pa participa y duna feedback pa esaki cristalisa.”
Por ehemplo algun hende a bisa Berlis pa hacie na momento di eleccion, “pero esey no ta e idea, den eleccion bo ta dicidiendo caba, mi idea e ora ey ta pa hacie maximo dos biaha den un termino di gobernacion. E ora ey bo ta bisa cu e ciudadano tin mas oportunidad pa vocifera ora cu tin temanan relevante,” el a bisa.
Berlis a conta cu na momento cu a introduci e ley aki el a ripara cu si tabatin reaccion di algun di su coleganan den parlamento, “reaccion di mi coleganan di Raiz den preguntanan y tambe cosnan cu a wordo buta riba social media, cu nan ta preocupa cu referedum lo por cambia e constitucion den articulo 1. Mi ta hopi asombra cu nan tin huristanan y hendenan hopi capaz den analisa un ley, esaki ta un referendum consultivo, bo tin cu consulta cu pueblo, no ta un referedum cu bo ta obliga pa haci e cambionan, nos ta consulta pueblo.”
Den su opinion, e argumento ey cu e instrumento aki por ser usa contra constitucion of cambio, e no ta bay ta automatico y si den caso pueblo no por dicidi, “e ora ey dunando e pueblo e derecho di bisa cu kier cambionan, a mi ta haya cu nan pensamento ta extremo y siendo cu ta un referedum consultivo e ta papia pa su mes y no ta impacta ni forsa un cambio directamente den sentido cu automaticamente, sino e ta keda e ora ey, despues cu a vocifera. Tampoco e no ta bay cambia libertad di expresion of di religion pasobra esey no ta make sense. Esey ta mi opinion.” Berlis a finalisa.
