Diahuebs ultimo durante e reunion publico sr. Mike de Meza, den un momento cu su consenshi a morde den prome tanda, a dicidi di menciona e berdad riba algun punto di e caso di Lee Tofanelli and Associates (LTA).

Sr. de Meza a menciona den su discurso den Parlamento cu e, e tempo ey como Minister di AVP, a laga traha un carta den cual e ta “trek in y finalisa” e caso di “vrijwaring” contra sr. Edison Briesen. E “confesion” aki a trece gran confusion, polemica y disgusto bao di e “hala nobo” di e fraccion di AVP, cu supuestamente no tabata na altura di esaki. Mike de Meza a hasta bergonsa e hala nobo di AVP ya cu ambos Ryçond y Gerlien a declara cu ainda tin caminda pa persigui sr. Briesen y pa lag’e para responsabel pa e daño cu mester paga LTA. Sinembargo, Mike de Meza a informa nan publicamente y a bisa cu esaki no ta berdad, pasobra e mes a traha e carta cu ta termina y trek in e caso aki.

Ademas di esaki, loke sr. de Meza NO ta splica ta, cu tin un di dos carta! E segundo carta aki, traha y firma 4 di Mei 2017 entre e abogado di Pais Aruba sr. Chris Lejuez (QEPD) y sr. Briesen, ta “establece” 5 punto cual ta prohibi y no ta duna espacio algun pa cualkier otro gobierno di Aruba por lanta e caso aki bek contra sr. Briesen den cualkier forma den futuro. Ban pasa riba e 5 puntonan aki di e segundo carta aki, ya cu e prome carta tabata e PETICION di sr. de Meza pa termina e caso contra Briesen y e di dos ta e ACUERDO final entre dos partidonan aki;

Punto 1: Door di firma e acuerdo aki ambos partido ta dicidi pa termina e caso den prome instancia na Aruba bao di number AR 879 di 2012, den cual pais Aruba a tene sr.Eddie Briesen personalmente responsabel den e caso di LTA contra pais Aruba.

Punto 2: Cada partido ta carga su mesun costonan di e caso aki cu a wordo termina.

Punto 3: Pais Aruba lo pidi Corte den prome instancia pa e caso contra sr. Briesen wordo destrui y termina dentro di 3 dia despues di a firma e acuerdo aki.

Punto 4: Ambos partido ta declara cu e caso aki a wordo finalisa y regla segun deseo di ambos partido y cu no tin nada mas di ricibi of exigi di otro y a dicidi pa duna otro un “kwijting incondicional.”

Punto 5: Ambos partido ta tuma distancia di e derecho pa den futuro kibra e acuerdo aki y pa rebiba e caso di vrijwaring.

Firma pa: Abogado representando pais Aruba y sr. Edison Briesen.

Manera pueblo por wak, e caso contra sr. Briesen no por wordo habri ni persigui mas! E forma con a formula e carta aki pa temina e caso aki di forma incondicional, y cu no tin espacio pa niun sorto di forma bolbe habri e caso. E fabula y mentira grandi di AVP cu ta ta insisti cu gobierno por a habri e caso aki bek na 2017 ta cai na awa, y awor pueblo por wak y compronde cu AVP, MAS y Marisol un biaha mas ta gaña y kier plak esaki riba coalicion. Marisol y Mike Eman kier drenta gobierno basa riba mentira. Esey ta e bon comun cu nan ta propaganda? Pueblo a wordo presenta cu prueba y documento pa asina cada un por wak ken te “gañado comun” y kendenan ta actua segun ley y bienestar di nos pais!