Slavernij Verleden, Cua Verleden?

Nos por a wak un comunicado di Minister President cu hunto cu Minister Ursell Arends diamars anochi den un conferencia di prensa cu a firma e leningsovereenkomst cu Hulanda na un porcentahe di 6.9% pa 20 aña. E porcentahe aki ta temporal te ora yega na un acuerdo mutuo riba un rijkswet pa asina e porcentahe aki baha. Gobierno ta wak como opcion pa busca un miho tasa di interes riba mercado financiero y asina elimina e presion y abuso di Hulanda colonial. Sigur niun hende ta contento cu e porcentahe aki! Gobierno a lucha cu Hulanda pa un trato husto. Gobierno a propone varios opcion pa yega na un acuerdo cu Hulanda pero semper Hulanda ta bari tur cos for di mesa. Adicionalmente Fraccion di MEP a manda pregunta pa Tweede Kamer cu nunca a wordo contesta. Adicionalmente Raad van State di Hulanda y Raad van Advies di Aruba den nan conseho na gobierno Hulandes a bisa cu Hulanda ta actuando di un forma incorecto tratando di impone e RAft riba nos pais.

Hulanda ta impone un interes halto basa riba dos mentira politico

Hulanda ta insinua cu mester pone un interes mas halto pasobra tin un riesgo segun Hulanda cu Aruba no por paga bek. Esaki ta completamente falso. Aruba semper a paga su debenan y lo sigui haci esaki.

Tambe, segun Hulanda, nos por cambia supervision financiero ki ora Aruba kier unilateral. Esaki no ta berdad pasobra tin un Protocol den lugar desde 2018 firma entre Aruba y Hulanda cu cualkier cambio cu Aruba kier, RMR mester bay di acuerdo cu esaki.

Prof. mr. Peter Nicolaï ta expone mentalidad colonial di gobierno Hulandes

Den su discurso den Eerste Kamer Hulandes Prof. mr. Peter Nicolaï ta cuestiona actuacion y abuso di e gobierno Hulandes contra Aruba riba e asunto di e COVID-lening. Mientras decenas di hende tabata muriendo aki na Aruba door di COVID, Hulanda a traha un plan macabro pa manipula Aruba pa drenta un Rijkswet y asina kita gran parti di nos autonomia.

Den un debate den Eerste Kamer na Hulanda prof. mr. Nicolaï ta bisa lo siguiente:

  • “Aruba ta wordo “castiga” cu un tasa di interes dobel, djis pasobra Hulanda ta exigi cu mester bin un Rijkswet pa haya un interes abao.”
  • “Ruman Grandi Hulanda ta fia placa na paisnan autonomo den Reino y awo ta exigi cambionan di ley djis pa via di e placa aki, cu ta bay contra di Statuto di Reino.”
  • “Aruba tin supervision financiero hopi bon. Hulanda tin “su dedenan bon hinca den e papa aki.” E supervision financiero y normanan ta funcionando hopi bon caba. Si Aruba tin supervision caba, un Protocol cu ta firma cu ta funciona, leynan financiero hinca den otro cu ta haciendo nan trabao, pakico anto gobierno Hulandes ta bisa bo ta haya straf si bo no ta acepta e RAft?”
  • “Hulanda a formula den articulo 15 lid 2 como 12 norma den e RAft con e presupuesto di pais Aruba mester ta hinca den otro. Prof. mr. Nicolaï ta continua bisando: mi ta sigur un pais autonomo manera Aruba lo bisa cu “nos tampoco ta bisa Hulanda con su presupuesto mester ta hinca den otro.”
  • Mi ta haya cu ta for di ordo cu Hulanda ta straf Aruba.
  • Art. 43 di Statuto di Reino mester tin un deugdelijkheid van bestuur, y si esaki no ta wordo sigui e ora ey so Hulanda por interveni den Aruba su finanzas. Pero si no ta asina, Hulanda mester prueba cu Aruba no tin un “deugdelijk bestuur.” Pero Hulanda NO ta haci esaki, pasobra e lo tin hopi problema hunto cu Raad van State pa prueba esaki.

Pa finalisa Prof. mr. Nicolaï a haci Van Huffelen varios pregunta. Notabel tabata con e la puntra e ultimo pregunta na secretario di estado Alexandra van Huffelen; “Con a baha e riesgo pa Hulanda, si Aruba awor ta wordo obliga pa paga un interes redobla pa e lening aki? E mente sano ta bisa cu e ta bira mas dificil pa Aruba. Segun mi e riesgo a subi.” Asina nos por compronde cu e mesun senadornan Hulandes ta denuncia e abuso di Hulanda y con nan ta abusando di nan poder contra Aruba! St.Maarten a haya 3.4%, Corsou 5.1% y pakico Aruba ta haya 6.9%? Slavernij verleden? Cua Verleden?