Diaranson ultimo, parlamentario y lider di fraccion MAS, Marisol Lopez a dirigi varios pregunta na minister di Finanzas, Xioamra Maduro, basa riba informacion y expresionnan di prome minister Evelyn Wever-Croes tocante e tema di ‘dwangsom’ cu gobierno mester paga ora cu no ta cumpli cu ordo di hues.
Conforme articulo III.17 di Constitucion di Aruba y conforme articulo 59 di e Reglamento di Ordo di Parlamento di Aruba, parlamentario Tromp a manda un total di cuater pregunta por escrito pa minister Maduro.
E documento ta indica cu a base di e declaracionnan di prome minister Evelyn Wever-Croes durante un conferencia di prensa y un entrevista cu un noticiero local siman pasa den cual a toca diferente tema, incluyendo e pago di dwangsom, parlamentario Tromp a manda e siguiente preguntanan pa minister Maduro.
Riba cual postnan den e administracion di Pais ta registra e dwangsomnan, ki riesgo e dwangsomnan aki ta trece pa pais Aruba, con por suavisa e posibel riesgonan aki y por ultimo el a puntra e minister si e por duna informacion detaya di e suma total y cantidad di dwangsomnan pa cada ministerio den e ultimo tres aña.
Durante un conferencia di prensa siman pasa prome minister a splica, contestando pregunta tocante e topico di dwangsom, cu ta importante pa tur peticion cu ta dirigi na gobierno haya un respuesta dentro di e tempo estableci. El a remarca cu e periodonan aki ta critico pa asina evita cu gobierno mester paga dwangsom.
El a subraya cu departamentonan di gobierno ta trahando pa introduci un procedemento pa evita cu problemanan cu tin di haber cu pago di dwangsom ta bolbe ripiti.
