ORANJESTAD – E topico di ocean mester keda uno di relevancia den nos agenda nacional como un isla chikito cu ta depende principalmente riba turismo. Esaki tabata parlamentario Jennifer Arends-Reyes den cuadro di e 15 conferencia di comision inter-gubernamental Oceanografico di Unesco (IOC) su region Caribe (IOCARIBE), cu a tuma luga e siman aki na Aruba, y cu a clausura ayera na La Cabana Hotel.
Arends-Reyes a laga sa na Bon Dia Aruba cu esaki tabata un escenario ideal pa obtene mas informacion posibel pa nos pais sigui traha riba investigacion haci. Tambe riba implementacion di ley pa proteccion di nos lama, pero tambe di nos flora y fauna marino. Un di e leynan cu ta drenta na vigor ta esun di ‘plastic ban’, cu e parlamentario ta considera como un paso grandi pa un isla chikito manera Aruba. “E ta un bon comienso, pero nos tin cu sigui den e rumbo ey,” el a declara.
Segun Arends-Reyes, ta sumamente importante pa sigui implementa e tipo di leynan aki. E ta corda cu basta tempo pasa tabatin diferente mocion den parlamento, hunto cu e ley di saco di plastic y e parti di styro foam. Un siguiente paso cu e ta haya importante -mirando cu nos como un comunidad chikito- hopi biaha ta druk di nos bida diario, ta haci hopi consumo di cosnan traha cu foam pa cuminda. Tambe riba e uzo di straw di plastic, cu mester wordo reemplasa cu otro tipo di material. El a remarca cu cientificamente ta conoci cu na momento cu e material aki ta cayente, e por tin su consecuencia pa salud a largo plaso.
El a aplaudi cu e cambio aki, hopi hotel a haci e te hasta prome cu e esaki a wordo implementa como ley. Nan ta pasonan relevante den industria di turismo, cu despues a wordo adopta como un ley nacional. Igualmente e uzo e prohibicion di cierto sunscreen cu tin entre nan ingredientenan oxibenzone, cu ta afecta e coralnan. Aruba como un isla tropical, caminda tur dia hopi persona ta uza sunscreen, mester ta consciente riba cuido di nos coralnan. Esaki ta un tendencia mundial, caminda a bin cu otro alternativa, manera sunscreen biodegradabel.
E ta haya cu e conferencia di IOCARIBE ta un paso importante riba e caminda di continuidad pa conserva nos medio ambiente. Nan a bin cu topico sumamente importante y necesario pa nos pais, entre otro sargassum y otro alganan, problema di dramamento di azeta, coral reefs, biodiversidad y cambio climatico; y acidificacion di ocean.
