Parlamentario Jennifer Arends- Reyes(AVP): ‘Ta sumamente lamentabel cu gobierno di MEP-POR-RED no kier trece trankilidad back den Enseñansa’

Segun sra. Arends- Reyes tin varios grupo den Enseñansa cu a haci nan maximo esfuerso pa trece na atencion di tur gobernante y parlamentario locual ta decisionnan cu nan no ta di acuerdo cune.

Parlamento tawata tin diferente sesion y cartanan cu a ricibi di sindicatonan y gruponan den Enseñansa. Aña escolar practicamente a caba y tin un decepcion masha grandi mes bou di hopi maestro. Nan tawatin speransa cu nan grito lo ser scucha y na final ta parce cu Minister di Enseñansa no kier scucha di ningun hende, ni e organo di mas halto cu ta Parlamento pa para su plannan specifico pa cu Traimerdia, SPO, SPPF y MDC. Ta sumamente lamentabel cu nos na Aruba a haya nos den un situacion cu gobierno unilateralmente ta bull doze tur decision.

Middag Mavo a keda den aire y probablemente lo bay cay bou di Enseñansa pa Empleo, muchanan chikito y mayornan a ser bisa cu nan por drenta kleuter mas trempan y no tin logra, muchanan mester un papel di Censo pa drenta scol y tin hopi mucha indocumenta cu ta na cas sin ricibi Enseñansa, cu ta bay contra derecho di mucha. Aruba ta pagando Unicef basta placa y e cumplimento no ta bayendo bon pa cu e tratado di derecho di mucha.

E ley di centro di cuido di mucha ainda ta warda un fecha pa minister pone bay na vigor!! Tur ta algun punto cu no ta bayendo bon den Enseñansa. Sra. Arends-Reyes a pidi un planning di mudamento di tur scolnan pa aña escolar nobo pero no a ricibi esaki y mayornan y maestronan lo ser confronta cu e noticia di mudamento despues. Enseñansa no ta pasando su miho momentonan y ta increibel cu ningun hende no por para e decisionnan cu no ta bayendo bon den ehecucion. Tambe ta primintiendo scolnan airco pero no tin transparencia di unda e fondonan ta bin di cual presupuesto of si ta di fondonan di sponsor priva. Un otro pregunta ta con e scol lo paga e cuentanan di coriente y dicon no ta sigui promove uzo di solar panels. Tur biaha cu a puntra Minister pa contesta pregunta te ainda no a ricibi contesta, cual tambe ta di lamenta. Na final di dia claridad y transparencia ta necesario pa tin mas trankilidad pa maestronan cu ta dedica nan bida na Enseñansa. Nos maestronan, mayornan y muchanan di Aruba merece hopi mas respet y merece un miho trato di gobierno MEP-POR-RED sra. Arends-Reyes ta termina bisando.