Parlamentario Jennifer Arends-Reyes(AVP): ‘Ta lamentabel cu Minister di Enseñansa ta scoge pa no contesta preguntanan clave pa salvaguardia derechonan di mucha na Aruba’

ORANJESTAD – Segun sra. Arends-Reyes ta hopi remarcabel con contradictorio e gobierno di coalicion di Mep-Por-Red ta trahando. Mientras e minister encarga cu asuntonan social hunto cu un parlamentario ta bishitando Unicef na Hulanda como bishita di trabou, na Aruba ehecucion y plannan pa cu implementacion di diferente derecho di mucha ta keda den aire.

Ta hopi lamentabel cu preguntanan cardinal a bay pa minister encarga cu Enseñansa tocante por ehempel ley di Enseñansa obligatorio na Aruba, su implementacion y plannan pa cu esaki simplemente ta keda sin contesta. Minister di Enseñansa a dicidi cu no lo conoce e fenomeno di ‘laatjarig’ mas y muchanan di 3 aña y pico tambe lo wordo acepta pa kleuterklas. Den practica ta pasando cu mayornan ta pasa hopi trabou pa haya un luga pa nan yiu bay scol pa motibo di cupo limita. Sra. Arends-Reyes como parlamentario a manda puntra di dia 5 di februari 2019 tocante cupo pa muchanan di scol y e cifranan di esaki y nos ta casi bay na e di 4 luna di aña y no ta wak ningun indicacion cu lo por ricibi claridad y transparencia ariba e plannan, cuanto mucha a meld aan, cuanto mucha a wordo poni riba lista pa warda, cuanto a wordo nenga cu ni riba lista nan no a pone nan y kico nan lo bay haci na cas siendo cu tin ley di Enseñansa obligatorio.

Keda sin contesta ariba e preguntanan aki sigur no ta parti di e bon gobernacion cu tanto ta papia di dje. Si di awor caba tin problema pa plaatsing di e muchanan, kico ta pensa di haci ora bin mas acerca pa motibo cu ta acepta nan mas hoben cu 4 aña. E scarsedad di maestro tambe ta parce cu no ta un problema den termino largo pa gobierno di Mep-Por-Red mirando cu a laga sa cu e trabou di maestro of docente facilmente lo por ser reemplasa den futuro. E mesun Minister cu ta papia di uza fondonan di Sociaal Crisis plan pa duna mas tempo y corigi e ley di centro di cuido di mucha ta papia di early- intervention y hustamente ta manca e centro specialisa pa early- intervention na Aruba cu ta e centro multi-disciplinario/ MDC door di descentralisa e ayudo y keda cu minimo specialistanan den e materia. Maestronan tin hopi preocupacion y cada biaha ta strafnan cu decisionnan cu no ta contribui na un luga di trabou cu ta trankil mirando cu ta crea duda ariba nan futuro di trabou of e bienestar di e alumnonan. Manera cu ta pasando na Traimerdia, middag Mavo of e futuro di SPO/scol pa ofishi cu tur decision ta keda den un promesa cu mester tene Minister contento sino e por reconsidera su decision na cualkier momento.

Cu por cierto tambe tawata den e lista di pregunta cu te ainda ta lagando Parlamento sin contesta riba nan. Esaki ta e incertidumbre cu maestronan mester traha den dje na aña 2019. Fuera di e puntonan menciona e tema di siguridad na pia di trabou pa maestronan tambe mester keda un topico di atencion den cooperacion cu e hunta di directiva y fundacionnan na cabes di scolnan na Aruba. Na 2011 y 2016 tawatin protocolnan estableci pero cu tempo mester revisa y renoba nan pa nan no keda riba papel so. Mester por tin miho palabracionnan cu ta pas na e situacion actual entre scol, maestro, mayor y alumno pa locual cu ta keda acepta sin consecuencia pa maltrato tanto verbalmente como fisicamente di maestronan riba tereno di scol y despues. Ta inaceptabel cu na aña 2019 cultivo di cannabis ta mas importante riba agenda pa simposio y no siguridad di nos maestronan y crea un clima di trabou trankilo pa nan por brinda e miho di nan mes como profesional. Cu tur e stress cu maestronan tin cu traha diariamente den dje ainda nan ta cumpli cu nan alumnonan. Un bon relacion entre scol, maestro, alumno y mayor ta importante pero mester corda cu mester tin respet mutuo den tur relacion caminda e derecho di mayor ta caba, esun di maestro ta cuminsa sra. Arends-Reyes ta termina bisando.