Durante ultimo simannan tras di lomba, partido AVP a wordo acerca pa diferente maestro-, mayor- y cabesantenan, kendenan a mustra nan preocupacion grandi pa e rumbo cu Enseñansa na Aruba ta bayendo, segun miembro di fraccion di AVP, Jennifer Arends – Reyes ta mustra.
Tur esaki tin di e haber cu e privatisacion di scolnan publico rond Aruba cu ta un asunto cu a wordo atendi caba den Parlamento y caminda e minister a haya un mensahe bon cla for di Parlamento.
Segun Parlamentario Arends Reyes, fraccion di AVP a haci numeroso peticion pa reunion publico pa atende maneho di Minister di Enseñansa pero cu ainda no a wordo honra y awor tin un situacion sumamente serio pa tur esunnan envolvi den Enseñansa di nos pais.
“Parlamento basicamente a bisa Minister Rudy Lampe cu e no mag di continua cu e practicanan aki, esta privatisacion di scolnan publico, pa motibo cu scolnan publico ta asina importante pa Aruba.
Fraccion di AVP tin un lista cu informacion di gran parti di e scolnan cu lo bay wordo privatisa y ta lanta e pregunta, ya cu hopi mayor ta mustra cu nan ta escoge netamente un fundacion, un scol, un vision pasobra nan ta di acuerdo cu esey.
Awor ta Minister ta bay dicidi cual fundacion ta bay haya cual scol mientras cu e mayor e ora cu ta bisa cu nan yiunan a custumbra caba na cierto scol y cu nan gusta e scol ey pero e scol awor ta bay cay bou maneho di un fundacion cu un otro vision, reglanan y norma cu tur consecuencia e ta trece cune.
Por mira pa loke ta trata Commandeur Pieterboerschool fuseer cu Graf van Zinzendorf School y ta dos diferente directiva. Scol Paso pa Futuro su localidad ta bay bira Beatrix School y SPCOA su edificio lo bira esun di Julianaschool pa nan scol nobo y caminda Juliana y Ceque ya a vocifera cu nan no a di acuerdo pa bay bou di e fundacion SMOA cu ta manehando Colegio Arubano of bou di SKOA.
Tur esakinan ta decisionnan cu e Minister a tuma unilateralmente caminda docentenan en cuestion no ta hayando informacionnan concreto, nan no a ni haya un carta di trempan den cual ta notifica nan di e cambio aki, loke sin duda ta algo hopi preocupante.
Abraham de Veer y John Wesley tambe lo bay cay bou di SPCOA, cu ta Stichting Protestant Christelijk Onderwijs Aruba, tambe tin e Fontein Kleuterschool cu lo fuse cu Hilario Angela cu lo bira Montessori scholen.
Tambe tin IPA cu practicamente lo mester integra cu Universidad di Aruba, aki atrobe e pregunta riba identidad di IPA si nan ta desea y con esaki ta bay asina sin mas.
EPI lo bay cay bou di stichting EPB y manera nos a mustra caba anteriormente, Colegio San Nicolas dependance y Dakota ta wordo cera y Colegio San Nicolas mes lo bay cay bou di stichting cu ta manehando Het Schakel College cu tur consecuencia cu e decisionnan aki lo bay trece, manera entre otro e posicion huridico di e maestro- y docentenan asina cu nan pasa pa un fundacion. E docentenan aki ta wordo uitgeleend pero lo mester cumpli cu e reglanan, norma y vision di e fundacion. Tambe e fundacion ta dicidi si mester e docente of no den caso cu tin menos alumno ta cumpli cu exigencianan y normanan nobo di e fundacion.
E Minister tabata bisa cu no ta bay tin cambio y cu tur cos lo keda mesun cos pero tur hende ya sa caba cu esaki no ta e caso ya cu ora bo a traha directamente pa gobierno, ta diferente cu ora un persona ta ‘gelijkgesteld’ na ambtenaarij.
Den e casonan aki ta di spera cu e docentenan lo realisa loke ta bay pasa cu nan den tur e cambionan aki caminda tanto e normering, e bestuur ta bay cay bou di e fundacion nobo y nos sa cu e parti di chens ta hopi menos pa locual e momento cu alumnonan ta sali for di e sistema di enseñansa pa un of otro motibo nan bay cay awor bou di un fundacion cu reglanan sumamente estricto.
Docentenan di Colegio San Nicolas tin cu bay solicita di nobo? Con e proceso aki ta bay?
Ya caba pa dia prome di Augustus ta asina cu e rector tin cu entrega y e ora un directiva interino nobo lo drenta pa loke ta maneho di e scol.
Na e momentonan aki nos ta sumamente preocupa cu e desaroyonan aki y nos ta spera cu docentenan y mayornan, awor ta na altura di tur loke ta pasando pero tambe pa politiconan defini kico ta nan posicion tocante di tur loke ta pasando,” Parlamentario Jennifer Arends Reyes a declara.
