E preocupacion ta keda vigente pa cu e situacion di SPO, segun parlamentario Jennifer Arends Reyes. Fraccion di AVP a scucha tur locual a bin dilanti, detayenan di locual a bisa na e maestronan preocupa, y cu esaki ta un problema andando pa basta tempo caba. For di luna di februari pa awo tin un incertidumbre sin tin claridad riba papel kico ta bay pasa cu nan.
Den sala di Parlamento a haya un confirmacion for di e minister en cuestion cu scol pa ofishi SPO Sta Cruz ta keda existi manera cu e ta, pero no ta bay tin lichting nobo, no ta bin muchanan nobo cu consecuencia cu den poco tempo e scol aki no lo ta existi mas. Tur esaki palabranan di e propio minister di Enseñansa Rudy Lampe.
E parlamentario Arends Reyes ta bisa cu ta parce cu un dependance no tin derecho di existencia na momento cu menos mucha ta bishita e scol, cual tabata expresion di e minister den parlamento y cu esaki ta algo cu e ta haya aceptabel. Punto cardinal di e declaracion ta cu no ta bay fuseer mientras di otro banda ta cuestiona si ta bay tin klas nobo, si ta bay tuma muchanan nobo na SPO.
Parlamentario Arends-Reyes ta enfatisa cu un carta dirigi na minister a keda entrega pa asina duna claridad si acaso e scol SPO na Sta Cruz ta keda un dependance di SPO. si e ta keda cu su derecho di existencia manera un scol y no pa un rato so! Na mes momento tambe a haci pregunta si ta bay acepta muchanan nobo y kico lo pasa cu e maestronan trahando awor na SPO Sta Cruz.
Declaracion haci durante dia pa prome minister Wever Croes ta masha bunita y cu tur cos ta “on hold” pero detayenan a keda falta cu ta di sumo importancia. “Ta spera honestidad y clarificacion mientras ta bay drenta temporada di vakantie keto bay den un incertidumbre.”
Pa finalisa parlamentario Jennifer Arends Reyes ta di opinion cu e decision aki ta uno descabeya, mustrando ariba cu fraccion di AVP tin basta tempo caba ta treciendo e puntonan aki dilanti, pero e minister ta keda draai rond di esaki, sin duna contesta bou cual condicion e scol aki lo keda existi.
