Parlamentario Jennifer Arends-Reyes(AVP): ‘Gobierno no ta dunando prioridad pa salvaguardia existencia di Centro Multi-Disciplinario na beneficio di nos muchanan’

Segun sra Arends-Reyes e Centro Multi-Disciplinario tin basta tempo ta pasando den incertidumbre y preocupacion pa nan futuro. Aruba conoce un Centro Multi-Disciplinario cu ta brinda servicio na tur scol di Aruba y ta specialisa den brinda ‘early-childhood’ intervention.

Centro Multi- Disciplinario of MDC ta canando un caminda di cruz pa mas cu un aña caba y te ainda ta luchando pa keda existi. MDC manera e Centro aki ta conoci pe ta pasando den un mal soño caminda cu basicamente tur e servicionan cu nan ta duna pa test, guia y brinda educacion specialisa na muchanan hoben cu tin un of otro discapacidad a ser decentralisa. Dimes cu tawatin un scarsedad masha grandi na specialista y e tiki nan cu tawatin a dicidi di bay traha otro caminda of a ser tuma ter beschikking un otro caminda. Tur servicio di MDC incluyendo diagnostico por ehempel di dyslexia ta gratuito, e lista ta largo pero ta un necesidad pa scolnan y mayornan pa nan test nan yiu. No ta tur mayor tin 1500 florin pa paga pa test nan yiu na un instituto priva. Un otro di e preocupacionnan banda di tur e cuido y guia cu ta ser brinda na MDC pa nos muchanan ta tambe e Teacher’s Care cu na luga di wordo fortifica y promove ayudo gratuito di un psicologo na disponibilidad di nos maestronan den caso cu nan mester, cu pronto si gobierno dicidi otro Teacher’s Care lo pasa pa pasado si laga e unico psicologo bay y no reemplas’e.

Esaki sigur lo ta un hecho sumamente lamentabel, caminda cu maestronan lo cay back den e sistema di AZV via dokter di cas evalua si ta referi nan na un psicologo. Cu ta netamente locual no tawata e meta di Teacher’s Care, e mester t’ey, wordo promovi y encurasha pa uza su servicio cu ta special pa nos maestronan na momento cu nan ta sinti necesario. Scol apenas a cera pero por ehempel un MDC cu a pidi pa gobierno tin un contesta pa nan prome cu 5 di juli 2019 cu a pasa, te ainda gobierno no a sali dilanti cu contesta of decisionnan cu tin cu ser prioritisa y tuma urgente pa asina tur e trahadonan di MDC wak ki por spera nan dia 1 di augustus cu ta nan prome dia back di trabou pa prepara tur cos. E incertidumbre, falta di claridad ta laga un suspenso hopi indeseabel pa mayornan cu tin yiunan cu advies pa observatie centrum, cu ta wardando riba un luga pa nan yiu, nan no sa cual localidad nan lo ser manda of si nan yiu lo mester bay Dornasol na Burunbundu cu ta full diferente na e meta di un observatie centrum, si e profesionalnan lo t’ey of ta keda na disposicion di MDC. Parlamento a pidi casi unanimamente cu excepcion di un parlamentario di MEP na April 2018 pa fortifica MDC brind’e apoyo y duna nan oportunidad pa contribui positivamente na locual ta nan experticio. Tempo ta coriendo y ta hopi scol, maestro y mayor tin mas pregunta cu contesta y no sa con nan prepara nan comienso di aña escolar nobo 2019-2020 sra. Arends-Reyes ta termina bisando.