Segun sra. Arends-Reyes locual ta pasando den Enseñansa ta sumamente preocupante, den pleno vacacion escolar maestronan ta haya un baño di awa friu pa locual ta trata nan salario. Banda cu no tin transparencia y un vision stabiel den Enseñansa cu den practica ta realisabel, no ta bon pa salud y trankilidad mental di maestronan pa hunga asina hopi cu nan pan di cada dia.

No mester lubida cu Enseñansa ta e pilar di un pais y ta sumamente lamentabel y insolito locual ta pasando na Aruba. Cu tin presion di Hulanda di CAft no ta algo cu ta exigi disciplina di awo sino di algun aña caba y no ta na Ministerio di Enseñansa so pa sacrifica pa e resto di Ministerionan, e carta ey mester a bay pa tur dienst cu ta draai overtime si tawatin un presion asina grandi y no mester tin ‘cherry picking’ un si y un no y sacrifica e maestronan pa mustra cu tin disciplina? Ta bida di nos muchanan y futuro di nos isla ta riba mesa na e momentonan aki pa wordo sacrifica. Ta Minister Lampe so tin disciplina den e coalicion ki? Ta di overtime di maestro lo kier kita e 12 miyon pa yuda yena e buraco di sugartax cu a presupuesta? Suppleties den presupuesto hopi biaha ta pa cubri overtime, no paso e ta pa pret ta traha overtime pero pa motibo cu e tawata necesario. Pero no ta parce cu tin scarsedad di maestronan esunnan cu tin contract por ehempel na Curriculum ta wordo notifica cu nan contract no ta wordo prolonga. Den caso cu no tin maestro suficiente na final lo busca di afo y tuma nan bou di contract nobo cu ta cay pafo di cifranan di aparato di ambtenaar?

Si e realidad ta cu tin hopi maestro cu ta traha ‘overuur’ door cu pone un plafond pa e maestronan ey no a soluciona e rason pakico ta draai e overuur. Colegio ta draai riba 27 lesuur como volledige betrekking, e 8 lesuur extra ta conta pa nan? Sra. Arends-Reyes ta di opinion cu tampoco ta na gobierno pa dicidi ken tin cu traha cuanto ora pa no haya burn-out, esey ta tarea di e schoolnan, personal, cabesante hunto cu HR y bestuur. Un gobierno no por bay micro-manage den Enseñansa, cada actor mester sa nan papel. Sigui corta den Enseñansa numa y e cobransa Aruba lo ricibi despues. Si ta den e rumbo ey Aruba kier bay ta tristo despues di a haya un espacio financiero di 300 miyon florin na comienso di e gobierno nobo pa goberna, a aumenta gasto di gobierno cu mas di 100 miyon, ta aumenta entrada cu 270 miyon extra y awo nan kier core cabes di gai. Si ta cifra so nan kier bay wak pa tene Hulanda contento a costo di castiga pueblo y stagna economia, nan ta den e organo fout, miho nan join CAft cu ta wak cifra nan so financiero nada economico. Un gobierno tin cu percura pa tur cos keda den balansa, cifra balansa y e bienestar di nos pueblo en general tambe como prioridad, e hende no matter si nan ta mucha, hoben, grandi, trahado, consumidor, comerciante mester keda central, na final di dia ta pueblo a pone gobierno pa salvaguardia nan interesnan. Den caso cu ta keda yora y tira culpa tocante Mega Debe pa falta di argumento, cifranan di cuenta anual di Banco Central ta mustra otro y salba fondo di pensioen tambe tawata un paso importante pa continuidad di e bienestar di nos grandinan y pone pan riba mesa di hopi mama y tata di famia. Enfin e carta data 22 di juli 2019 firma pa Minister Rudy Lampe cu a trece hopi disgusto den maestronan pa tende cu nan lo por bay atras cu un averahe di 600 florin si nan ‘cap’ nan oranan cu mag di traha y no mag di traha extra na e middag scholen, avond scholen, Traimerdia ta keda riba mesa con cu bo kier wak e tanten cu no trek e in. E montantenan aki pa aña ta yega riba 7 mil florin extra riba salario di un maestro ta ekivalente si a kita e beneficionan material manera vakantie geld, reparatie premie y otro. Indirectamente ta bezig ta hol uit e beneficionan di ambtenaar of gelijkgestelden. Awor ta sali cu ta algun grupo so lo a ser exonera di e kapmento aki, banda di Wiskunde no a specifica cual otro mas. Den sra. Arends-Reyes su opinion no por cuida un grupo pa burn out y otro ta bisa nan bay burn out numa, ta mesun hende nan a keda, atrobe ta un otro argumento hopi fofo. Tambe ta bisa cu lo uza mas tecnologia, digitalisacion y menos maestro, shonnan esaki no ta e realidad di bezetting na e momentonan aki, hobennan lo mester di computer ruimtes cu computernan cu ta traha of Open leer Centra na tur scol como rekisito pa nan traha independientemente pa reduci les of contactuur.

Tambe cu no por ‘verzilver’ e dianan di vakantie si tawata malo ta algo cu no tin mucho sentido si e bestuurnan ta wordo paga na momento tin ziekmelding, e malesa ta wordo cubri pues dicon lo no kier duna nan e opcion di paga nan dianan cu nan tin derecho riba dje di vacacion? Kiermen malesa ta wordo castiga mientras cu e ta algo cu no por premira y e no ta discrimina. Na final di dia ta spera cu maestronan no tene miedo y vocifera nan opinion y sindicatonan boga pa tur maestro y no keda satisfecho cu palabra of exoneracion di algun grupo, salario pa maestronan tambe ta importante y cada biaha cu corta ta Enseñansa ta bay atras asina y nos maestronan merece un miho trato, dimes ta for di nan salario nan ta paga hopi gasto adicional na beneficio di nan alumnonan, pa corta den nan salario asina y dicidi pa nan cuanto ora y cua grupo mag traha mas ta inhusto sra. Arends-Reyes ta termina bisando.