Como un ‘logro grandi’ Parlamentario di AVP, Jennifer Arends-Reyes a cualifica e apertura di e proyecto Watty Vos Boulevard, cu a keda na disposicion di automobilistanan, ciclistanan y peatonnan, ayera mainta.
“Un biaha mas, masha pabien Aruba. Mi ta kere cu nos tur por wak unda nos placa a bay den e proyectonan aki. Ban ta consciente den trafico pa asina nos tur por saca bon probecho di e proyecto grandi aki,” el a expresa.
E hecho cu e proyecto aki ta nifica 25 kilometer nobo di caminda, cu ta inclui areanan renoba, 13 rotonde nobo, dos over-pass, pero tambe 17 kilometer disponibel pa nos ciclistanan. P’esey Arends-Reyes ta consider’e como un proyecto grandi y importante pa pais Aruba.
E Parlamentario a probecha e oportunidad aki pa bin cu un serie di sugerencia y conseho pa tur esunnan cu lo haci uzo di Watty Vos Boulevard, specialmente nos automobilistanan, mirando cu ta trata di un caretera nobo. Aruba tin casi 80 mil vehiculo di motor y ta importante pa bay poco poco den trafico.
E ta conseha pa controla bon e direccion unda bo ta bay. Tambe controla e velocidad di e vehiculo. Aunke e velocidad maximo ta 80km, mester paga tino cu na momento cu bo ta yegando un rotonde bo mester baha velocidad.
No lubida di bisti faha di siguridad. Igualmente pa siguridad di e muchanan haci uzo di e car seat. Tambe ta importante pa haci uzo di luz di direccion, y pa tene cuenta cu e zebrapad cu a wordo construi cerca di e rotondenan, y tambe pa paga tino riba e peatonnan.
“Nan ta cosnan cu bo ta bisa ta algo normal. Pero ora bo tin situacionnan nobo den trafico, sigur ta bon pa pone enfasis riba esakinan,” Arends-Reyes a bisa.
E proyecto aki ta uno cu ta mara pais Aruba, pero tambe e compania di construccion na 22 aña di compromiso mutuo. E tin di haber cu e parti di e compromiso financiero di un banda, pero di otro banda e compromiso di e compania pa haci mantencion di e proyecto aki.
Arends-Reyes a bisa cu e idea tras di e proyecto aki tabata pa facilita un opcion pa e ruta di transporte pa e waf di carga na Barcadera, y e area hotelero. Igualmente pa a tene cuenta cu e parti social-economico cu mester a wordo desaroya. Tambe pa reduci e congestion cu nos a yega di conoce den Oranjestad y den areanan residencial rond di Aruba.
E ta un proyecto PPP (Private Public Partnership) cu a wordo concretisa durante gobernacion anterior, y cu tabata un vision di su partido AVP, el a bisa.
