Pues aki un luna a ser acorda cu Aruba su Enseñansa lo cuminsa cu un audit grandi cu ayudo tecnico di exterior. Un di e puntonan di preocupacion ta kico lo ser considera y midi como ‘ineficiencia’ den e sistema di Enseñansa? Te ainda a corta den pago pa remediëring, sabiendo cu muchanan a bay over pa motibo di pandemia. Tambe oranan pa guia alumnonan cu tin stress cu e situacion na cas no ta trankil.
Entre otro pa motibo di pandemia y perdida di entrada y poder di compra den hogarnan. Y den caso extremo hasta perdida di nan cas mes of medio di transporte pa motibo cu a tume den beslag. Cual ta realidad nan na Aruba. Spera cu den e audit ta bay tene na cuenta cu tin les cu no a wordo caba y toch e alumno mester wak na final con e por pasa pa e sigui entre klas. Si no tin suficiente maestro cu lo kier bin Aruba pa traha sabiendo cu e pago aki lo ta hopi menos cu na Hulanda, sabiendo cu si e externe krachten aki no gusta nan bay wak con nan paga pa hiba nan inboedel Hulanda back. Sin conta e situacion y factor di alumnonan cu no tin internet na cas, no tin un computer pa nan mes, mester a traha les riba telefon etc etc. Spera cu involucra tur partido durante e audit of at least entrevistanan y no manera cu Salubridad ta haya nan mes confronta cu mas recorte y despues un comision ta wordo instala siendo cu e decision drastico y irealistico a ser tuma caba. E resultado di e prome trimester na mayoria di scolnan tawata menos bon compara cu añanan pre-covid. Y tin scolnan hasta cu a yega na 70% di e jaarlaag nan a haya un rapport insuficiente compara cu 30% e mesun periodo un aña anterior. Spera cu e doorlichting/audit tuma esaki ta tambe den consideracion na momento cu bay duna recomendacion pa mantene of reduci subsidio a base di e resultadonan di e alumnonan Sra. Arends-Reyes ta termina bisando.
