Parlamentario Jennifer Arends-Reyes (AVP): Gobierno mester pone bon cla pa Hulanda cu pueblo no tin y no lo tin e forsa financiero pa e resto di aña 2020

Segun Parlamentario Jennifer Arends-Reyes pais Aruba y su ciudadanonan continuamente ta sufriendo e consecuencianan drastico di un economia cu a bay plat desde maart ultimo.

Nos ta bay pa e di 4 luna cu mama y tatanan di famia a keda sin entrada y ta depende di plaso di banco si nan tin e suerte di a cay den remarca. Y un grupo grandi cu a keda depende di Fase y subsidio di salario sin conta esnan cu no  a yega na remarca pa nada y ta depende di voedselpakket.

Tanto e plaso di banco como e Fase y subsidio di salario lo bin back den un forma of otro pa paga un dia sea ta den pagonan adicional riba e prestamo of impuesto. E plaso di banconan ta cabando y antayera gobierno a anuncia cu e ayudo di Fase tambe ta yegando su fin y tur cu ta sin trabou of cu tin nan mesun negoshi sin personal lo mester wak con nan lo sobrevivi e resto di aña, basicamente ‘jongens, bekijk het maar’.

Ta cu ki entrada lo kier pa paga huur, hypotheek y prestamonan si Turismo ta leu di yega su punto di break even di 60 of 70% aki 2 luna. Apenas nos ta na 10% ney y mirando cu e mundo di crucero tambe ta riba un hold te October of mas despues, pues ta masha poco poco e recuperacion ta bay. Basicamente gobierno mester declara e aña aki cu pueblo no tin y no ta bay tin forsa financiero y no tin poder di compra manera cu Hulanda kier impone riba estadisticonan y condicionnan pa Aruba, e ta riesgoso y e bida di nos ciudadanonan ta den wega. Entre tanto e fecha di 14 di Augustus tambe ta yegando cerca caminda cu e conseho di minister di reino lo reuni tocante e paketenan di medida y condiciona extremo cu a presenta a cambio di ayudo di prestamo pa e islanan CAS, Curacao, Aruba y Sint Maarten.

Curacao a manda corespondencia pa Hulanda cu de facto ta acepta y lo delibera solamente ariba e aspectonan huridico. Aruba a bisa cu gobernacion ta tranca pero tranca mes ta bisa cu ta deliberando riba detaye. Ta practicamente un siman mas tin pa delibera riba nombernan di entidad si ta keda CHE of lo bira menos CHE .. si ta RFT mes ta keda cun’e of ta bira RAFT… Hulanda no a duna mucho espacio, enfin locual ta spera Aruba como medida y condicion mara na e prestamo nobo nan no lo ta algo cu Aruba ta sperando riba dj’e.

Y como golpi den herida Aruba ta bay di un covid-free island pa un super spread surge di covid cu tabata free for all to catch. A warda asina hopi pa pone uzo di mask como algo obligatorio na algun establecimento, caminda cu partido AVP pa basta tempo a enfatisa cu internacionalmente e ta un metodo hunto cu e distanciamento fisico y higiena mester wordo implementa pa Aruba tambe manera cu habri frontera. Pero ja, ta AVP a bisa y tabata pro -uzo di mask ki mishi gobierno tende, ta prefera di a bay den un campaña di popularidad y duna un impresion cu local no por haya covid mas cu lema pal’i homber y pal’i muhe y awor ta e palo pa suta pueblo so a resta.

Ora sra Arends-Reyes a haci preguntanan 2 siman pasa tocante e covid insurance y kico e ta cubri y kico ta e breaking point di cantidad di patiëntnan den isolacion 100,200,300,400, 500? te ainda Minister di Salubridad no a contesta por escrito.

Tabatin un avalancha di entrevista mesun dia di rueda di prensa di sra Arends-Reyes pero no ta contesta e preguntanan cu a haci oficialmente. Ainda Aruba conoce un capacidad limita di camanan di ICU cu opschalingsplan di 10,20, 30 cama incluyendo salanan di operacion y pa esnan cu ta bisa cu ta un griep so e virus aki ta y bay bebe vitamina pa bo immuun pa bo keda menos dia malo, e ta un virus serio cu tin continentenan henter den su gara y hospitalnan plat caminda cu hendenan no ta yega na e cuido medico cu nan mester haya.

Cu un AZV manka, 16% di nos poblacion, un 20 mil hende como grupo risico pa complicacion y frontera pa Colombia, Corsou y Bonaire cera y no sa si Merca lo tuma nos patiëntnan grave pa motibo cu nan mes ta nan maximo cu nan capacidad den hospitalnan e virus ki no por tum’e light. Y sin lubida cu pa motibo di e pandemia aki nos ta na rudia na Hulanda, Aruba su economia no por wanta un lock down mas.

Aruba a conoce mas di 500 persona cu a test riba un dia y den transcurso di dianan lo wak e resultado sin conta esnan cu ainda tin cu ta un ‘false negative’ cu falta pa caba e tempo di incubacion. Lo ta bon pa introduci banchi di color pa esnan den isolacion y cuarentena cu a caba di yega of esnan cu ta wardando e tempo di incubacion pasa pa por wak con ta yuda tene e personanan aki na nan cas of na lugar di cuarentena. Si DVG no tin suficiente personal, pueblo si lo ta atento pa e personanan cu banchi aki riba caya. Locual mester remarca ta cu pa motibo cu ta via dokter di cas mester pasa, cada dia cu pasa ta dianan cu mas persona por pifia y infecta mas hende. E number di telefon durante e prome wave mester wordo activa back, mester por yama directamente pa por hasi test sin mester warda riba dokter di cas. No ta tur persona tin 100 dollar of 250 florin pa un test riba nan mes pa motibo cu no por a haya dokter di cas. E mester keda ‘laag drempelig’ y gratis, pone mas personal y habri e liña di telefon gratis pa meld urgentemente. Scapa centjes y perde tur cos no ta un opcion na e momentonan aki.

Cada dia cu pasa ta dos siman atras nos ta bay. Tin loopholes den e sistema di test, controla isolacion y cuarentena, ban drech’e awor! Pa locual ta trata scolnan cu ta bay habri ta pidi pa gobierno dicidi trempan kico e ta bay bira pa mayornan, scolnan y maestronan por prepara na tempo. Desde 1 di juli pa awor nos a ricibi 16,432 pasahero di exterior di cual 13, 103 tabata turista. Di 8 mil cu a palabra pa luna a permiti hopi mas turista y mester ta hopi mas rigoroso riba e distanciamento fisico. Mester percura cu ley pa un ley pa tur tanto bishitante como local tocante mask excluyendo muchanan bou di 13 aña pa motibo cu internacionalmente no ta recomenda pa mucha chikito bisti mask sra Arends-Reyes ta termina bisando.