Segun parlamentario Jennifer Arends-Reyes, nos por a wak y scucha maestronan pa basta tempo caba ta manda carta y ta vocifera nan preocupacion na gobierno. Tin desaroyo nobo, pero cada biaha e desaroyonan aki no ta na beneficio di maestronan.

Mas nan ta wordo perhudica, mas nan ta wordo intimida di tur skina directo y indirecto via medio social y prensa y asina nan no ta sinti nan mes confortabel ni liber pa expresa nan mes. Esey ta e realidad cu nos ta bibando aden na 2019, duna tur cu kier expresa nan mes e espacio pa hasi’e.

Despues cu fraccion di AVP a pidi un reunion publico na varios ocasion, ainda e maestronan ta wardando pa e reunion wordo yama. Tabata tin varios manifestacion exigiendo pa pone mas atencion riba e condicionnan y trabou mes di maestro cu ta exigi atencion. Cu tur respet pa tur dia di estudio pa maestro, innovacion ta bon den Enseñansa, pero corda cu maestronan ta e curason di Enseñansa si no percura pa scucha nan y tuma nan na serio, no lo tin ni begeleider manera cu e Minister su vision ta pa e tarea di maestronan den Enseñansa den futuro cercano.

Na momento cu un grupo di maestro a forma y pidi pa atencion pa siguridad y a sinta cu gobierno riba e tematico aki, te ainda no a logra yega na solucion duradero. Ora cu maestronan a pidi atencion pa e presion di trabou, nan a bisa nan pasa via dokter di cas pa wordo verwezen pa un psycholoog, caminda antes tabatin un profesional special pa atende maestronan a base anonimo, asina Teacher’s Care a pasa pa pasado.

Cartanan di inkietud di maestronan a yega Parlamento y gobierno, Minister Lampe a contesta door di splica su maneho y su punto di bista. Lo tabata bon pa wak e inkietud mas di cerca pa wak unda ta raiz di e problemanan cu den practica y bista di maestronan no ta bay bon. Gobierno te ainda ta debe un grupo di maestro oranan cu nan a traha desde cu scol a habri y no a wordo paga p’e, cu ta algo cu ningun otro dienst no lo acepta pa traha sin pago.

E balor di salud y vitalidad di nos maestronan ta importante en bes di reenforsa Human resource y Teacher’s care pa guia y yuda ta mira con lihe por deshace di maestronan cu experiencia. Pa corta gasto maestronan cu contract no sa si nan trabou lo continua. Si hasta na Hulanda falta maestro, ta di unda lo kier haya maestro? Un punto sigur tambe cu ta bon pa menciona ta e parti di ‘equal work is equal pay’, pa profesionalnan cu no a studia pedagogia pa duna les, mester tin cautela cu e pensamento y maneho aki pa tur vak, mirando cu a uza esaki pa Avond onderwijs, pero no por hala maestronan un banda manera cu a sosode luna pasa na Enseñansa anochi.

E sindicatonan Simar y Seppa a uni hunto cu otro sindicatonan pa habri e discusion di indexering, mirando cu desde 2014 pa 2017 Aruba no tabatin un aumento den costo di bida y den un tempo cortico, awor Aruba a conoce un aumento di mas cu 5% di inflacion. Despues di a rechasa e proposicion di gobierno, no a tende nada mas di e negociacionnan, siendo cu por a tuma nota cu otro Ministerio si a yama nan sindicatonan concerni pa nan diensten y Enseñansa atrobe a keda atras. Mescos cu tin otro Ministerionan cu si ta buscando fondo y permiso pa inverti den infrastructura, Enseñansa y maestronan no ta hayando e balor y respet cu nan merece.

Ta dicon tin un presion asina grandi pa continua corta den Enseñansa? Si kier corta den presupuesto mas cu 12 miyon na extra uur pa docentenan y tin plan serio pa scapa mas cu 30 miyon pa ningun mucha na Aruba mag keda sinta mas, implementa den un solo biaha y no den pilot ni fase, ta algun di e temanan cu tin maestronan hopi preocupa y cu ta exigi mas claridad riba nan. Mientras Hulanda ta inverti den Enseñansa ta tristo pa wak cu na Aruba ta sigui corta den Enseñansa sin piedad, sin corda cu e daño na nos comunidad ta despues nos lo wak e.