Segun Sra. Arends-Reyes nos ta terminando aña 2020 y den e aña aki por bisa cu Enseñansa a sufri hopi. Pa cuminsa cu un recorte di casi 25 miyon cu sigur ta laga su efectonan atras siendo cu e aña di pandemia tawata un aña crucial.
Tin varios grupo cu durante aña mester a bin dilanti, lucha pa locual nan ta kere aden y na final nan a kere den promesanan di Minister cu no por a cumpli. Un di e gruponan aki tawata e maestronan di Scol Paso pa futuro, cu a trece nan preocupacionnan dilanti na varios ocasion y na final ta asina cu nan ta haya nan ta sali di nan localidad y fuseer cu otro scol.
Nos a wak cu a implementa un maneho pa bay over y no a cumpli cu e palabracion pa paga e docentenan pa duna lesnan di remediëring. Nos a wak cu e docentenan mester a traha hopi duro sin cu hopi biaha a scucha kico tur nan tin mester of ta pasando aden. E trato pa cu prolongacion di contract di trabou tambe a bay hopi robes caminda cu tawatin hopi insiguridad pa trabou y tambe e personal di limpiesa ta pasando den e insiguridad aki primordialmente. No tin claridad si ta continua cu nan y con, despues di tanto aña di servicio, mescos ta conta pa e instructornan di natacion escolar.
Situacionnan sumamente fastioso pa cu Enseñansa y esunnan cu ta traha dia den y dia afo na bienestar di nos muchanan y hobennan. Na hopi ocasion contra deseo di Parlamento a continua cu plannan cu no ta carga e sosten amplio. Den e aña nobo tin varios topico manera e privatisacion di scolnan publico cu parce ta den full preparacion, tambe unda diferente scolnan lo wordo aloca.
Tin varios planes pa cu scolnan secundario publico cay bou di fundacionnan pero parce cu esakinan no ta bin na luz te ora nan ta casi un hecho caba. Hechonan ta cu e plannan inicial cu no tin mucho sosten ta simplemente continua cu aprobacion di coalicion. Lo keda monitoria e desaroyonan den Enseñansa y spera cu pa e aña nobo tin miho noticia y trato pa cu Enseñansa na Aruba Sra. Arends-Reyes ta termina bisando.
