Riba dia 4 di maart ultimo, Santos do Nacimento a vota na fabor di introduccion riba den april 2024 di e ley cu Professor de Doelder a prepara, y awo e ta splica e motibonan tras di su voto, despues di a ricibi critica pa esaki den medionan di comunicacion local.

Segun Santos do Nascimento, “un voto pro e introduccion di e ley ‘ki ta un voto: pro mehoracion di e derechonan di victima; pro combati criminalidad y pro mehoracion di derecho di detenido.”

Santos do Nascimento ta enfatisa cu ta un mentira “cu segun ley vigente e detenido ta pasa den un cel na Warda di Polis un maximo di 10 dia.”

“Esey ta un mentira, pasobra e ley vigente ta permiti pa wanta un detenido un maximo di 26 dia den un cel na Warda di Polis. E Wetboek van Strafvordering ta permiti un detenido pasa tanto su 2 + 8 dia di inverzekeringstelling como su 8 + 8 dia di bewaring na Warda di Polis (lesa articulonan 87 y 93 di e Wetboek van Strafvordering vigente).

“E ley nobo ta limita detencion den un cel na Warda di Polis na un maximo di 3 + 3 dia. Esey kiermen cu e ley nobo ta baha e maximo di 26 dia na Warda di Polis te na 6 dia. Segun e ley nobo (lesa articulonan 93 y 94 di e Wetboek van Strafvordering nobo) e bewaring ta baha na 14 dia y mester tuma luga na Huis van Bewaring.”

Ademas, el a enfatisa cu e ley nobo ta introduci exigencia di maximo 6 dia na Warda di Polis, y minister di Husticia a uza un Nota di Cambio pa crea un uitstel temporario di e regla nobo di inverzekeringstelling y bewaring pa motibonan logistico.

Tambe Santos do Nascimento a haci referencia un carta di Orde van Advocaten cu ta pidi Staten pa no aproba e Nota di Cambio di minister, bisando: “Constitucion ta duna gobierno e derecho exclusivo di cambia un proyecto di ley cu gobierno ta presenta na parlamento, te ora cu parlamento ta aproba of rechasa e ley. E Nota di Cambio ta bira parti integral di e proyecto di ley (lesa articulo V.5 inciso 1 di nos Staatsregeling). E carta di Orde van Advocaten ta un berguensa pa abogacia na Aruba, pasobra e ta demostra cu Orde no ta compronde e proceso legislativo manera e ta hancra den nos Constitucion y cu Orde no a compronde kico e Nota di Cambio ta encera ni kico su consecuencianan ta. Un voto contra e Invoeringsverordening Wetboek van Strafvordering ta un voto contra derechonan humano fundamental.”

Pa finalisa, e parlamentario ta aclaria cu “oposicion no kiermen cu bo ta vota contra pa ta contra. Bo ta vota pa bienestar di Pueblo. Ora Gobierno ta haci algo bon pa Pueblo, ta bo obligacion etico y moral manera parlamentario pa vota pro.”