Den un video cu el a publica riba su social media unda e tabata duna un declaracion na prensa local, e parlamentario independiente Ryçond Santos do Nascimento a expresa cu e preocupacion mas grandi cu e tin pa loke ta trata e situacion cu e taxistanan ta e ley e cual “ta prohibi pa hende transporta hende pa placa, al menos cu tin un taxi vergunning.”

Manera el a sigura, for di e gobernantenan mes taxistanan ta haya un permiso di taxi, pero no ta e ciudadano cu ta pidi pa ken e traspasa e permiso di taxi, “pero tin un excepcion den ley e cual ta cu den caso cu un persona ta bira malo of hasta e ta fayece, e ora por pidi pa traspasa e vergunning ey pa otro integrante di e hogar ey, pa asina e hogar ey no bay sufri den su entrada pa motibo di e situacion cu e taxista ta haya su mes aden of e fayecimento hasta.”

Den su declaracion, Do Nascimento a indica cu esey ta e structura di e ley y cu su pregunta dirigi na minister encarga cu cartera di transporte publico Ursell Arends tabata ta si e lo honra e parti aki y minister Arends a conteste cu pa esey lo bin cu un relegheidtoets y cu esey ta algo cu comision semper lo pone den balans. Ademas a sigura cu lo bin un di tres Ministeriële Regeling (MB) riba e asunto aki y esey ta keda un preocupacion hopi grandi pa Do Nascimento manera el a bisa.

Pero pafo di excepcion aki, minister Arends den reunion publico di diahuebs ultimo na Parlamento di Aruba, segun Do Nascimento a indica, a trece un argumento hopi valido, “tin corupcion den pais aki, tin nepotismo den pais aki, tin un sistema di patronahe politico den e pais aki y nos ta haci como si fuera cu e no ta existi, cu nos ta nos ‘santito’ desde 1986 y esey simplemente no ta e berdad, nos mester combati nepotismo, nos mester combati patronahe politico y ora cu ministernan ta haci esfuerso pa cambia esaki e ora nos mester bin cu seriedad.”

El a trece dilanti cu e abogado di e taxistanan, e cual ta abogado Desiree Croes, pero segun Do Nascimento “e no a papia riba articulo 15 y tampoco a papia di excepcion, no a bay riba contenido, esey ta nifica cu bo ta hunga cu sentimento di hende, hasta di bo mesun clientenan pa motibonan politico. E cos ey vooral pa mantene un sistema corupto, e ta hopi malo pa e pais aki.”

Riba su rednan social, abogado Croes a duna su opinion den caso aki y a seña la cu “minister kier cambia un parti importante den ley di transporte di persona (lv personenvervoer) pa kita loke e ta considera kartelvorming. Dus cu taxistanan door di por pasa nan permiso pa un miembro di famia tin tur poder. Esaki ta regla den ley pa hopi tempo asina. Corda no ta taxi ta traha ni cambia ley. Ta gobiernonan den pasado (por lo menos 50 aña pasa) a pensa cu esaki ta necesario y a regle asina y mantene asina. Corda: por pasa pa un famia NO bende na famia ni na no-famia. Pues no por haci negoshi cu e permiso. Ok, e idea ta sona husto, pero te ora bo wak e otro banda di medaya: taxistanan no tin pensioen regla ni un ziektekostenverzekering manera otro trahadornan si tin. P’esey, nan ta mira e posibilidad di por pasa e permiso pa un miembro di famia manera un ouderdomsvoorziening (un manera pa haya un entrada ora no por traha mas).” El a skirbi.

 

Ademas a sigura cu “awor, minister y taxistanan ta para leu di otro. Enves di start cu dialogo cu tur stakeholders of nan representante pa na final yega na un decision basa riba consensus ta bolter e cos y ta start cu un MB (e decision prome e dialogo: un cambio drastico den maneho) sin regla e posicion di taxistanan den fase, por ehemplo, un MB no ta para riba ley y lo mester warda riba cambio di ley pa realmente implementa e cambionan desea pa minister. Pues, e ley mester bay Parlamento. Mientrastanto however, e maneho anuncia lo ta na vigor 1 september. Claro cu taxistanan cu no ta di acuerdo cu e cambionan ni cu e procedura, ta protesta esaki. Minister cu mientras tanto a mira su fout (of su conseheronan a mustr’e cu loke e kier haci no por) bou presion a dicidi di bay cambia e MB. E cambio ta asina grandi cu de facto e no ta e mes MB mas . Awor nos ta pidi pa kita e MB (cu ta malo) for di mesa pa nos por dialoga sin cuchiu riba mesa, pero minister ta vertik pa haci esaki. Manera un mucha malcria e ta prefera e guera envez di admiti su fout.”

Di su parti, Do Nascimento ta convenci cu e intencion di minister Arends pa combati corupcion y e solucionnan cu e ta bin cune den cuadro aki “ora e cos ta bon, bo mester bisa cu e cos ta bon y ora algo ta malo den pais aki, bo mester bisa cu e ta malo. A mi tabata e prome pa critica e minister aki, pero riba e asunto aki minister tin rason cu mester combati sistema coruptivo y no solamente den area aki, si minister ta haci un esfuerso pa cambia esaki nos mester aplaudi esey.” el a finalisa.