Dialuna ultimo, parlamentario Alvin Molina a presenta como iniciador un ley di iniciativa di “Referendum” na Parlamento, pa esaki keda manda na Raad van Advies. Parlamentario independiente, Ryçond do Nascimento tabata presente na e entrega y den e comunicado di prensa aki, a duna su opinion riba e tema di Referendum pa Aruba.

Hopi hende a acerca mi pa expresa nan apoyo y contento cu e iniciativa pa hancra e instrumento di Referendum den nos Constitucion. Riba Facebook tambe tin hopi sosten. Nan ta completamente di acuerdo cu mi cu den un democracia ta pueblo ta dicidi riba e futuro social, cultural y economico di un pais.

Un referendum consultativo ta un forma di consulta pueblo den cual ta puntra e poblacion pa expresa su opinion riba un propuesta di ley of un cuestion politico. Asina ta obliga gobierno y parlamento pa ta consciente di e opinion di e ciudadanonan. Di e manera ey un referendum ta un herment di democracia directo cu ta permiti pueblo tin un bos den decisionnan crucial. Tin momento cu cierto tema specifico ta asina importante of controversial cu e ta mas corecto pa nos tur tin e oportunidad di expresa nos mes directamente.

Naturalmente tambe tin algun hende cu ta contra e referendum. Mi kier adresa dos di e preocupacionnan. E prome ta cu tin hende tin miedo cu referendum lo wordo usa pa cualkier cos chikito. Nan ta sinti cu esey lo tranca gobierno den su trabao y asina stroba gobernacion normal di nos pais. E di dos preocupacion ta cu un referendum por trece hopi gastonan cune.

Mi ta kere cu ta importante pa adresa e puntonan aki. Esaki ta mi contesta riba e preocupacionnan aki:

E posibilidad pa tene un referendum no ta pa usa pa cualkier decision chikito. E mester keda reserva pa cuestionnan di gran importancia. Esey ta crea un responsabilidad grandi pa nos tur como ciudadano busca e informacion necesario, drenta den dialogo cu otro y pensa profundo pa asina nos por haci uso di e Referendum den un forma responsabel.

Costo tambe ta un factor importante pa considera, pero esey no por ta excuus pa lubida e balor di e participacion democratico. E instrumento di un referendum ta hustamente fortalece e legitimidad di e decisionnan cu gobernantenan ta tuma. Ademas, e decision pa realisa un referendum no ta wordo tuma den forma descabeya; pasobra e ta sigui un proceso legal y politico riguroso.

En fin, berdad e ta importante pa nos gobernantenan por dirigi nos pais, pero den algun caso e ta importante pa permiti cu pueblo ta expresa su mes directamente pa medio di un referendum. Mi ta convenci cu esey ta un paso importante den direccion di un democracia mas fuerte y mas inclusivo.