A traves di un comunicado di prensa, parlamentario independiente Ryçon do Nascimento a comenta riba e situacion di su ex-colega di partido, Gerlien Croes.

Ryçond y Gerlien a drenta e filanan di partido AVP destina pa bira lidernan prominente di e partido. Na 2021 partido a duna ambos politico un number halto riba su lista di candidato. Di e forma aki, AVP a prepara caminda pa un carera politico largo pa nan cu perspectiva sigur pa bira minister. Pero, e posicionnan 5 y 4 riba e lista tabatin su prijs. Tiki tiki AVP tabata spera mas di Ryçond y Gerlien pa nan sostene sistema di patronahe politico.

“Poco poco AVP tabata kier mas hustificacion di ex-ministernan Paul Croes y Benny Sevinger. Mientras tanto AVP tabata gaña mas y mas encuanto e sentencianan, e soborno y e fixnan corupto. Tur hende por a mira AVP perde tur tipo di berguensa y enfoca completamente riba poder. P’esey AVP ta busca trigger emocion di pueblo cu diferente tipo di slogan pa evita cu pueblo ta realisa e condicion di e partido.

“For di 17 di maart te dia 17 di april 2023, e ancianonan di AVP a pone e balornan fundamental di Ryçond y Gerlien na prueba. Dia 17 di maart, Mike Eman a manda Mike de Meza na e show radial Enfoke pa gaña henter pais, pa mira si Ryçond y Gerlien lo mustra lealtad na sistema di patronahe politico. Ryçond a dicidi confronta partido publicamente y denuncia e engaño. Dia 14 di april, Mike Eman mes a gaña henter pais bisando cu hues a sentencia Benny Sevinger pa corupcion solamente pa salba cara di ministerio publico. Despues, Mike Eman a anuncia un reunion di partido pa dia 17 di april pa dicidi si Benny Sevinger lo keda den parlamento pa AVP. Durante e reunion, abogado Hans Sjiem Fat tabata invita pa troce e berdad pa partido, pa asina tur hende vota pa tene Benny den parlamento. E dia ey Ryçond no a warda ningun momento extra pa anuncia cu e ta bandona AVP de inmediato. Den un entrevista nacional el a splica pueblo cu e no por sostene un partido cu ta riba un rumbo di acelera corupcion den nos sociedad. E bon comun tabata mas importante pa Ryçond cu sigui riba un caminda politico di exito personal den un marco corupto. Ryçond tabata convenci cu e mester tuma un posicion fuerte pa berdad y contra corupcion.”

Gerlien, na su turno, no tabatin ningun gana pa bandona AVP dia 17 di april, segun Do Nascimento. “En bes di expresa problema cu e rumbo corupto, el a expresa di a sinti su mes humilia, pasobra e ancianonan no a invit’e pa un reunion secreto. Despues di reunion di partido dia 17 di april, Gerlien a dicidi pa negocia mas influencia den partido. El a hiba reunionnan largo cu Mike Eman. Gerlien tabatin contacto cu Leoncita Arends y Pieter Susebeek y tabatin diferente reunion cu su circulo intimo. Na mes momento reunionnan a tuma luga entre Henny Eman, Hans Sjiem Fat y e omo di Gerlien, esta Duke Croes. Un grupo den Gerlien su circulo intimo a conseha pa no acepta liderazgo di partido AVP, pasobra famia Eman lo manda un di nan mes, Trevor Eman, pa studia derecho pa asina tuma liderazgo di partido over. Na final di dia Gerlien lo mester a duna poder back na Trevor, mescos cu Tico Croes mester a duna poder back na Mike Eman. Tambe tabatin preocupacion cu Benny Sevinger tabata preparando su yiu muher pa bira su sucesor politico. Asina Gerlien a anticipa hopi lucha pa poder den partido. Gerlien y Mike ta e uniconan cu sa exactamente e resultado di tur e negociacion aki.

“Loke si nos sa, ta cu Gerlien a tarda un luna mas cu Ryçond pa anuncia su retiro for di AVP. Ademas el a anuncia su salida riba dia 15 di mei 2023 den un conferencia di prensa den presencia di Mike Eman. Na final di su anuncio Mike a duna Gerlien un brasa caluroso. Nunca Gerlien a realmente denuncia corupcion den AVP. Tampoco el a e menciona e idiotes pa laga un persona convicto pa soborno sigui representa AVP den parlamento. Desde cu el a sali for di AVP el a continua cu e politica sensacionalista di pone enfasis riba su shimis berde y buscando pleito cu ministernan y parlamentarionan di MEP.

“Gerlien ta demostra asina cu su curason ta berde berde ainda. Na december 2023 Gerlien a duna sosten den parlamento na e esfuerso pa proyecta Mike Eman como proximo minister-president. Tur hende por a mira Gerlien mustra su lealtad na e sistema di mentira durante e programa di Enfoke di dia 4 di maart ultimo. El a sali gaña henter pais cu Rocco Tjon a introduci un ley pa aumenta detencion di sospechoso penal den celnan di polis te na 20 dia. Ora nos analisa mensahenan di Gerlien for di tempo cu el a laga AVP, e no a haci nada otro sino mustra potret di su mes, mientras cu e ta evita di papia di corupcion, pintando su mes hopi biaha como victima di sexismo. Mientrastanto el a cuminsa un partido nobo hunto cu Daphne Lejuez cu respaldo di un grupo di AVP. Su partido ta AVP 1.3 diseña pa haya voto di votadornan desilusiona di AVP, pa asina yuda AVP bolbe den poder. Esaki ta e peligernan di mantene un curason berde cu solamente ta anhela poder y exito politico.”