Despues di declaracion di parlamentario di partido MEP Ricky Hoek ken a sigura “cu tur partido politico ta corupto, no tin cura” y cu MEP a crea leynan pa caba corupcion, e parlamentario independiente Ryçond Do Nascimento a reacciona mirando cu den algun casonan penal cu actualmente ta bao investigacion ta involucra ex-ministernan di partido MEP.

Pa Do Nascimento e argumento cu partido MEP no ta corupto segun Hoek a sigura, el a trece dilanti cu MEP ta e co-fundador di patronahe politico desde 1986, caminda MEP cu AVP a funda e sistema “corupto” aki di patronahe politico, ademas e ta puntra su mes “con ex-minister Guilfred Besaril a haya e brio pa haci loke el a haci na Arubahuis? Dicon Chris Romero y Eddie Briesen a haya e brio di haci loke nan a haci den e caso Kwihi? Of e campañadonan di minister Dangui Oduber den e caso di Vacuna gate denomina Anglo cu tambe a haya e brio di haci loke nan a haci?”

Pa loke ta trata e leynan cu segun Hoek partido MEP a crea pa loke ta trata integridad y ta pa evita corupcion, pa Do Nascimento “tanto bale pa bin cu mil ley si na e pais aki no ta ser cumpli cu e contenido di e ley, pero mester admiti si cu hopi di e atakenan cu ta bin contra MEP na e momentonan aki ta bin di parti di personanan, politiconan y partidonan cu tin speransa di bay goberna hunto cu AVP den e siguiente gobernacion, e ora nos mester ta honesto y sincero di bisa cu prome minister Evelyn Wever-Croes a laga haci un investigacion den e caso di Besaril, na unda el a comparti e contenido di e investigacion cu parlamento di Aruba y el a entrega e rapport di Centrale Accountantsdienst Aruba (CAD) cu Ministerio Publico.”

Esey pa su persona ta importante pa motibo cu ora ta pone partido MEP na banda di partido AVP segun e mes a sigura “nos mester conclui cu Sra. Evelyn Wever-Croes ta un santo compara cu Sr. Mike Eman pa motibo cu den tempo di Gabinete Mike Eman 1 y 2, Mike Eman no a worry cu tur advertencia cu tabata sosodiendo den Cocolishi y cu e no a laga haci ni un investigacion door di CAD pa lo cual ta Sr. Benny Sevinger, Sr. Otmar Oduber , Sra. Michelle Hooijboer-Winklaar of Sr. Arthur Dowers y mucho menos el a entrega ni un documento na Ministerio Publico, en cambio lo cual AVP si a haci ta pa pusha pa bin investigacion contra partido MEP,” el a bisa.

Den esaki, el a amplia cu e investigacionnan cu nan kier pa haci tabata contra Endy Croes y Eddie Briesen, loke den su opinion ta demostra cu bao gobernacion di AVP tabata “lihe pa proteha friends y lihe pa persigui contrincantenan politico y mas corupto cu esey, bo no por tin den un sistema ya cu esey ta nifica cu bo sistema ta partidario, cu bo tin prehuicionan y bo ta mustra cu den un pais asina poder ta ser monopolisa.”

Pero den esey no ta nifica cu partido MEP segun Do Nascimento punto di bista, no a actua malo, loke e ta nifica ta cu “den e comparacion di AVP y MEP, MEP ta sali miho, pero mester bisa tambe cu Sra. Evelyn Wever-Croes a haci foutnan grandi riba e topico di integridad, e prome fout tabata ta cu el a bay bisa den campaña cu integridad nace, bo ta nace cune, pero e ta un fout pasobra bo ta bagatelisa e problema, cu e ta manera un appel putri cu e solucion ta facilito, como si e solucion tabata cu laga ambtenaar basha abou riba otro y laga esun cu a haci malo sinta riba su blaar, esey no ta e solucion pa e problema di corupcion institucional cu nos tin na Aruba,” el a comenta.

Den sentido aki, e ta sigura cu “Hulanda ta un aliado importante den e guera contra corupcion “crioyo” na e pais aki y p’esey en bes di coy pleito cu Sra. Van Huffelen, e Sra. Evelyn Wever-Croes mester demostra na e pais aki cu e landspakket ta importante pasobra pa medio di e landspakket ta bay introduci proceduranan strak cu e ta bay haci imposibel pa haci comercio cu tereno, cu ontheffing of contractnan gubernamental y ora nos a wak nombramento politico den Setar, den RDA, WEB, Utilities Aruba, entre otro, esey ta e motibo di pakico landspakket ta asina importante.” Do Nascimento ta enfatisa.

Asina tambe a declara cu si prome minister ta keda nenga pa un supervision financiero “e ta preparando e cama pa e yiunan politico di Mike Eman bay haci y deshaci cu finanzas publico di e pais aki corumpiendo e sistema, usando e fondonan pa mete nan politico, esey ta e realidad y si Sra. Evelyn Wever-Croes no ta tuma curashi pa tuma e medidanan aki,e pasonan firme, e ora nos tin cu conclui cu partido MEP ta cobarde pa ataca e problema di corupcion na su rais den e pais aki.” El a conclui.

Nota di redaccion:

  • Na Aruba: Na e momento aki tin 4 politico condena penal pa corupcion.
  • Na Corsou: Tin 2 politico condena pa corupcion y 1 pa asesinato di Helmin Wiels.
  • Na Sint Maarten: Tin 2 condena na e momento aki pa corupcion.
  • Partido AVP: Na e momento aki tin 3 condena pa corupcion.
  • Partido POR: Na e momento aki tin 2 politico condena pa corupcion y 1 sospechoso di husticia na e momento aki den caso Flamingo.
  • Partido MEP: Tin 2 sospechoso di husticia na e momento aki, un cu ta den caso Kwihi e ex- minister Chris Romero y ex-minister plenipotenciario Guilfred Besaril den e caso Tulipan.