Dia 20 di maart 2023 Otmar Oduber a tene un rueda di prensa encuanto caso Flamingo den cual e ta un sospechoso. El a subraya su inocencia. El a elabora cu no tin ningun prueba contra dje. Segun Otmar ta pa scapa cara di Ministerio Publico cu a core gara e storia di spirito di Marisol Tromp. El a ataca e credibilidad di Ministerio Publico door di pone su flechanan riba Marisol.

Segun Otmar, Marisol a entrega ‘denuncia falso’ contra Chris Dammers, Marisol no tabata ministeriabel pa motibo di un debe miyonario cu belasting, AVP y MEP a core cu Marisol y hasta partido POR a core cu Marisol pa motibo di su falta di integridad.

Un par di dia despues, riba dia 24 di maart, hues a condena lider di POR, Allan Howel, pa falta di integridad. E sentencia ta mustra entre otro cu Allan a bay puntra Sinterklaas con lief e tesorera di e fundacion di fractie di POR tabata. Aparentemente Sinterklaas a bisa Allan cu e tesorera tabata lief y cu e tabata merece un bonus di Afl. 1000,- mientras cu Allan mes tabata merece un bonus di Afl. 10.000,-. Pa e tipo di echonan aki Allan a haya 24 luna di prison pa estafa di casi Afl. 200.000,- di Pais Aruba. Ministerio Publico a reacciona riba e sentencia cu e promesa cu lo sigui actua contra corupcion.

Sospechosonan y nan sostenedornan tin e tendencia di ataca Ministerio Publico. Nos a mira esey den caso Ibis, caso Avestrus y den caso Flamingo. Pero un politico mester tin Aruba na pecho y pensa riba e consecuencianan di su atakenan. E atakenan ta fomenta desconfiansa bao di hubentud contra nos sistema hudicial. Ciudadanonan cu ta perde confiansa no kier colabora cu polis y husticia. Asina e politiconan aki ta pone seguridad di henter nos comunidad den peliger.

Pio ainda ta ora cu politiconan ta cuminsa fomenta sinberguenseria den nos pais, siñando nos hobennan pa gaña y pa no worry cu ley. Nos tur ta conoci cu e mentira cu Paul Croes lo a bay prison pa dos caha di cerbes y un wea di sopi. Pa colmo hopi hende ta kere e mentira. Mescos nos a mira den caso Avestrus. Hende ta plama e mentira cu Corte no por a prueba corupcion di Benny Sevinger. E berdad ta cu hues a haya tanto Paul como Benny culpabel di soborno y malversacion.

Ta un lastima cu Otmar kier sigui e mal ehempelnan relata na casonan Ibis y Avestrus. Manera Zwarte Piet e kier core cu ruchi tras di henter e cadena hudicial y e mes aparentemente ta un santito cu ta merece alabansa. Djis scuch’e elabora riba e transaccion entre Ministerio Publico y Hans Geerman. Conscientemente Otmar ta insinua cu ta normal pa gaña den administracion di Pais Aruba cu un persona a ser nombra pa traha como “medewerker bedrijfsvoering”, mientras su spirito so ta haci e trabao ey. Asina e ta despista pueblo. Pero e transaccion entre Ministerio Publico y Hans Geerman ta papia pa su mes: e storia di spirito ta berdad! Ta tempo pa Otmar bandona e talking point di Paul Croes y Benny Sevinger cu ta tur politico ta haci e. Ta keda na Otmar pa bandona e fila di politico cu ta divulga cu loke ta corupto ta normal y “nada robes”.