Mediante un post cu parlamentario independiente Gerlien Croes a publica riba rednan social, ta cuestiona e dunamento di mas di 2.000 camber extra pa hotelnan, caminda el a señala cu “MEP ta culpa AVP, pero MEP mes a beneficia di entre otro, e dealnan y acuerdo pa traha 3 Ibero Star hotel 3 aña pasa tambe.”
Mediante un peticion por escrito dirigi na prome minister Evelyn Wever-Croes, e parlamentario a solicita e contesta na un cantidad di 14 pregunta relaciona cu e desaroyo infrastructural y di construccion di hotelnan, mas uso y maneho di e beachnan actualmente y pa futuro.
“Minister por comparti cu Parlamento di Aruba e cantidad di peticion pa permiso precario cu tin actualmente, incluyendo e fechanan di peticion pa permiso pa entre otro, pone strandstoelen, palapas, kleedhok, towelhut, massagehut, toilet, opslagruimte, lunchdecks, bars y otro actividadnan riba beach incluyendo e zona di peticion di meter cuadra?” ta un di e prome preguntanan.
Tambe por mira cu e ta puntra tocante maneho di palapa ta bay via vergunning, lista di e permisonan precario duna pa palapa so y ken ta responsabel pa maneho di e palapanan den e zonanan specifico. “Si minister por comparti e maneho di DIP cu tabatin pa e beachnan “strandbeleid” for di 2014 te cu maart 2024, incluyendo e cambionan specifico cu tabatin den maneho durante e periodo aki?”
Un di e preguntanan cu tambe a hala atencion ta “si minister por comparti kico ta e acuerdo cu e siguiente hotelnan cu ta den construccion tocante e futuro uso di e beachnan”, cual ta lo siguiente:
Hotel St. Regis Aruba Resort (200 camber extra pa december 2024);
Gran Ibero Star 1 (240 camber pa december 2024;
Grand Ibero Star 2 (400 camber pa 2025);
Ibero Star Tierra delk Sol (200 camber 2025);
Expansion Hotel Hilton (160 camber pa 2025);
Port City2x Boutique Hotrel cu maximo 100 camber pa cada un;
Secret’s Hotel na San Nicolas fase 1 y 2 (900 camber total);
Ampliacion Manchebo Hotel (100 camber);
Ampliacion Divi Phoenix (140 camber);
Y 741 unidad di condominio bao construccion actualmente.
Croes ta puntra ken ta esun cu a duna e opcion di e terenonan aki. “MEP ta culpa AVP, pero MEP mes a beneficia di entre otro, e dealnan y acuerdo pa traha 3 Ibero Star hotel 3 aña pasa tambe. Kico esaki ta bay nifica pa Aruba, pa nos uso di beachnan? Kico Minister president a acorda cu e hotelnan aki pa cu precario pa uso di nos beachnan? Anto ainda nos falta papia di ken ta bay traha na e hotelnan aki y con prepara Aruba ta pa esaki. A hinca Aruba den desaroyo sin limite, y ken a pensa di e consecuencianan real pa e pais aki y nos futuro? Anto esunnan cu a hinca nos den esaki kiermen di ta bay saca nos di dje?”
Tan solo keda warda si prome minister ta bay contesta e preguntanan aki na parlamentario Croes of lo dicidi di yama un reunion publico cu lo ta algo mas miho den terminonan di “Transparencia” , ya cu no solamente e parlamentario Croes ta trece dilanti su preocupacion sino comunidad en general tambe y hasta turistanan cu ta interesa di haya sa ki efectonan e mas di 2.000 camber ta bay trece pa un isla asina chikito manera Aruba.
