Minister di Finanzas a anuncia un aumento riba e suma di reparatietoeslag pa pensionado di 30 florin. Esaki a pone e parlamentario independiente Gerlien Croes haci un calculacion lihe den su mente, cu e crenchi placa’ki ta yega net pa 2 kipashi, 1 paki di ham y 1 di keshi y por ta un paki di manteca.
Di otro banda, Gobierno ta generando e mayor entrada den su historia, specificamente un 1.7 biyon florin na impuesto cu, como consecuencia, ta produci e surplus di 150 miyon florin cu Gabinete Wever-Croes II ta pronkia cune.
E decision di Gabinete Wever-Croes II pa aumenta e repartietoeslag pa pensionado, ta un strategia puramente populista, segun e parlamentario a indica den un comunicado di prensa. E ta kere cu conscientemente gobierno ta aleha di un maneho financiero responsabel caminda ideal lo ta pa reparti e entrada di pais entre gasto y compensacion publico real, inversion y pago di debe nacional.
Cu gasto ta referi y enfatisa riba e miyones den fondo destina pa goederen en diensten (gasto operacional di gobierno) y di personal, cu a subi di 2022 pa 2025 cu 82 miyon! Conseho di Caft riba e proyecto di presupuesto 2025, den su prome pagina caba ta indica cu gobierno “no a inclui suficiente informacion tocante e desaroyo di e ratio di debe y e gastonan di personal, pa por evalua si Aruba ta cumpli cu e normanan aplicabel,” y den mesun alinea ta bolbe conseha pa “elabora un agenda di inversion multianual y pa structuralmente controla e gastonan.”
Parlamentario independiente Croes: “Obvio cu campaña ta andando y p’esey ta haci e anuncionan aki.” E ta urgi e ciudadano pa: “No laga nan gaña bo cu e 30 florin aki.” Aruba merece un gobernacion cu reconoce y tin preocupacion real pa e realidad actual di su pueblo, mescos cu pa e futuro.
