Recientemente, Parlamentario Independiente Sr. dr. Ryçond do Nascimento, a traves di un comunicado di prensa, a trece padilanti su opinion ariba e problemanan actual den partido politico AVP, partido cual e tabata forma parti di dje anteriormente, y con den su opinion, e dominio di famia Eman ta e causa principal di e problemanan aki.

E parlamentario ta indica den e comunicado cu e problemanan actual den AVP ta consecuencia di e dominio colonial di e famia Eman y e dominio aki, segun el a señala, tin tres caracteristica.

Segun e parlamentario e prome caracteristica aki ta falta di transparencia y democracia. El a splica cu for di su punto di bista, decisionnan clave ta wordo tuma pa e rumannan Eman en bes di pa henter e partido hunto y cu esaki ta un cuestion di mantene poder den man di e famia.

“Awendia e reunionnan aki ta tuma luga den cas di mama Blanche, na unda nan ta conspira y discuti, y si un hende ta representa un menasa pa e poder di famia Eman, nan ta studia con nan por elimina e persona ey. Ta di e manera aki e Emannan hunto cu nan siguidonan di mas fiel a pone obstaculo den caminda di Betico Croes, Watty Vos, Tico Croes y Otmar Oduber pa neutralisa nan. E manera con e Emannan a combati Watty Vos internamente, ta wordo sinti como un traicion te dia di awe. E desgusto t’ey ainda den Playa P’ariba y Playa P’abao,” do Nascimento a expresa.

El a sigui menciona cu na di dos luga tin un cultura di faboritismo den AVP. El a indica cu e lider tin algun favorito, e “prins- y prinsesnan”, cu ta wordo poni den spotlight cada rato. El a agrega cu na mesun momento no ta excepcional pa e lider falta respet na e demas candidato- y boluntarionan y cu ademas, e competencianan di e candidatonan y nan esfuersonan ta wordo ignora. “E candidato y boluntarionan ey no ta sinti e seguridad pa nan por expresa nan desacuerdo ni e confiansa pa por confronta e situacion actual pa miedo di represalia di e famia,” el a remarca.

Y e di tres caracteristica cu e parlamentario independiente ta trece padilanti den su opinion ta cu nan ta gusta crea ja-knikker. Do Nascimento ta resalta cu si un persona cu ta parti di e partido kier un carera politico largo y influencia den partido, e mester bira un ja-knikker.

E personanan aki, el a señala, tin speransa pa haya un number chikito riba e lista di candidato y aunke hopi di nan tin critica fuerte riba e lider, nan no tin curashi pa bis’e manera e ta.

“E elementonan narcisista di e lider tampoco ta yuda crea un comunicacion habri. Ora bo confronta e lider cu e berdad, su man ta cuminsa tembla, e ta bira cora y e kier bin te na bo cas pa exigi rectificacion. Casi nunca un hende ta wak e lider den su wowo, ta bis’e e berdad y ta mand’e su cas back cu un troshi di bacoba,” e parlamentario a expresa.

For di su punto di bista, famia Eman ta crea e aparencia di no tin arte ni parte den ningun di e scandalnan di corupcion cu ta afecta AVP. Sin embargo, el a señala, ta evidente cu AVP ta un tera fertil pa corupcion. El a menciona cu por lo menos seis di e nuebe ministernan di AVP durante e gabinetenan di Mike Eman tabata envolvi den scandalnan di corupcion of negoshi raro y cu e ministernan aki tabata mas preocupa cu enrikece nan mes y gana e siguiente eleccion cu e progreso structural di Aruba.

Do Nascimento a señala cu, entre otro, ex-minister Michelle Hooyboer-Winklaar, por ehempel, tabata involucra den un concesion dudoso na e compania InsureToStudy BV pa seguro di salud pa studiantenan Arubiano na Hulanda; ex-minister Paul Croes a ser condena pa crea un comercio cu ontheffing relaciona na e prueba di mercado laboral; y ex-minister Benny Sevinger a wordo condena pa motibo di soborno relaciona na terenonan comercial.

“Mientras e partido ta specialisa su mes den practicanan dudoso, AVP a perde su base profesional. Fundacion Mito Croes y Fundacion Digna Laclé-Herrera no ta mas cu un fachada. Profesionalnan manera Juan David Irausquin, Angel Bermudez y Richard Arends no kier ta involucra activamente cu e politica di e partido. Ta dificil pa un profesional serio asocia su mes cu AVP si e partido no kier asumi responsabilidad di loke su ministernan a haci, y mucho menos e partido kier haci algo pa preveni cu e fechorianan ta bolbe tuma luga. Pa colmo AVP ta acusa e huesnan y Ministerio Publico di corupcion, pasobra Croes y Sevinger a haya condena pa soborno,” e Parlamentario Independiente a expresa.

El a indica cu di e 33 mil persona cu a vota pa AVP na 2013, masha hopi a bandona e partido. Na 2017 no menos cu 11mil votado a bandona AVP, y na 2021 otro 5mil votado. El señala cu si e tendencia aki continua, e partido lo por conta solamente cu tres asiento na 2025, cu posiblemente un of dos restzetels.

E parlamentario ta di opinion cu ademas, e partido nunca a demostra di ta capaz di por planifica di manera efectivo. El a trece pa dilanti como ehempel e investigacion di Algemene Rekenkamer riba e proyecto BO ARUBA.

El a remarca cu e investigacion ta mustra cu e proyecto a ranca sali malo desde su principio y cu e no tabatin obhetivonan claro, loke ta haci e imposibel pa midi e exito di e proyecto. El a señala cu Algemene Rekenkamer a conclui cu e proyecto a expone Aruba na riesgonan di integridad y riesgonan financiero y cu e mal administracion di e proyecto a crea un sinfin di oportunidad pa mafia gana placa.

Do Nascimento a agrega cu AVP a crea diferente debe, manera debe riba e Presupuesto Nacional, fondonan special, fundacionnan di gobierno, companianan estatal, SOGA y e famoso PPP. El a remarca cu no ta un sorpresa si e proyecto BO ARUBA ainda tin un impacto negativo riba e situacion financiero di Aruba y, en particular, riba inflacion.

“Ta pa motibo di un debe mas grandi cu interesnan halto ta crea urgencia pa Departamento di Impuesto recauda impuestonan cu mas eficiencia. Pa motibo di e falta di responsabilidad y falta di disciplina fiscal, Hulanda a impone supervision financiero riba Aruba. Ademas, como cu proyecto BO ARUBA no tabata cumpli cu ningun norma di sostenibilidad, ta e maneho di Gabinete Mike Eman a convence Hulanda cu Aruba mester di reforma, loke a conduci na e pakete di reforma conoci como Landspakket 2020,” el a expresa.

Pro ultimo el a resalta den su opinion, tin solucion pa e problema di AVP, y esaki ta cu e partido mester reforma profundamente. Esaki, el a expresa, ta inclui cu e structura colonial mester hala un banda pa Good Governance, un codigo di integridad, identificacion di funcionnan cu tin riesgo pa corupcion y un proceso los di famia Eman pa selecciona candidatonan.

For di su punto di bista, el a indica cu e partido mester bandona e manera ad hoc di traha y mustra compromiso sincero cu sostenibilidad.

“Ta e ora ey solamente planificacion efectivo por ta parti di e proceso di tuma decision den AVP. Mester desaroya competencia den e partido, ya cu actualmente e partido no tin e capacidad necesario pa goberna di manera responsabel. Finalmente, e mentalidad di “fix” mester cambia pa un mentalidad cu realmente tin curason pa nos patria, nos yiunan y nietonan,” Do Nascimento a finalisa.

Nota di redaccion: Un observacion cercano di e partidonan politico na Aruba ta mustra e sistema di dinastia of ‘friends and family’, similar na esun di AVP, ta prevalente den tur partido tradicional.