Diahuebs 13 di augustus, Minister President den un reunion publico (openbare bijeenkomst) a pidi reaccion di tur fraccion y miembro independiente pa loke ta e resultado di e negociacion te cu ayera. Mi a manda mi reaccion por escrito por medio di Parlamento ayera mes na Hulandes y lo a traduci esaki den lineanan grandi pa mas facilidad na Papiamento:
Minister President a tene un presentacion ayera unda el a duna nos un update di status di e negociacion, pa cual el a manda nos un carta y documentacion e dia anterior. Basa riba esaki el a pidi reaccion, pregunta y standpunt di miembronan di Parlamento.
Locual ta remarcabel for di e documentacion y splicacion ricibi ta, cu no tin mucho espacio mas pa cambio, pero tampoco mucho tempo mas pa sigui warda, ya cu e recursonan financiero di nos Pais ta limita y den un termino hopi cortico lo no por sigui paga FASE, loonsubsidie ni MKB regeling, ni Gobierno lo por sigui cubri su responsabilidadnan financiero. A base di esaki a haci e siguiente preguntanan:
1. Kico ta e posibilidad realisticamente pa ainda trece cambio den e ultimo version di e landspakket cu a keda manda pa Staten diaranson?
2. Ta existi e posibilidad pa no bay di acuerdo cu cierto punto den e landspakket of rijkswet, pero toch logra ricibi e tercer tranche di fiansa?
3. Kico ta e punto di bista y conseho di Gobierno mes na e momentonan aki cu e condicionnan presenta? Bay di acuerdo, of no?
4. Kico ta e ultimo fecha na e momentonan aki na unda ainda lo por paga FASE, loonsubsidie y MKB regeling?
5. Kico ta e ultimo fecha na e momentonan aki na unda gobierno por cumpli cu tur su responsabilidadnan financiero? Den ki secuencia y cu ki prioridad lo haci pagonan den caso cu fondonan financiero di Gobierno no ta suficiente?
6. Gobierno lo por comparti cu Staten e ultimo version di e dos Rijkswetnan (Raft y OHH) cu ta den negociacion?
7. Gobierno a pidi Raad van Advies pa conseho tocante e Rijkswetten y Landspakket dia 16 di juli y a ricibi un contesta di Raad van Advies dia 24 di Juli (”Advies ex. Artikel 17, onderdeel b, van de Landsverordening Raad van Advies, betreffende de ontwerp-Rijkswet Caribisch orgaan voor hervorming en herstel, ontwerp-Rijkswet Aruba financieel toezicht, en het ‘landspakket’ (onderlinge regeling) Kenmerk: RvA 97-20”) Gobierno lo por comparti un copia di e conseho aki cu Staten?
Pa locual ta trata mi punto di bista den mi rol como representante di Pueblo, pa mi primeramente mester mira nos comunidad, nos situacion actual, y kico e alternativanan realistico lo ta, cu of sin ayudo financiero di Hulanda.
Mester tene cuenta cu e consecuencia socio-economico di nos Pais si keda pospone e tumamento di decision y mester duna oido na nos stakeholdernan.
Ta obvio pa cualkier persona cu e forma y momento cu e condicionnan di Hulanda a ser presenta no merece niun elogio. Pero esey no kiermen cu nos no mester keda realistico y honesto cu nos mes. Tin razon y keda insisti, mientras cu nos bisiña ta perde su trabao y no por alimenta y cuida su famia pasobra e compania na cual e ta traha mester a bati bancarota pa falta di ayudo financiero cu nos ta ricibi di Hulanda, segun mi no ta sirbi interes general di nos poblacion.
Pues lo mi kier urgi gobierno pa tuma un decision a corto plazo. Un decision den cual e ciudadano lo sufri lo menos posibel e consecuencia adicional negativo financiero y social y na unda nos como Pais por reanuda e debate cu Hulanda riba nos posicion estatal na un otro momento den futuro cercano. Na final di dia ta trata aki un proposicion di 6 aña bao cual no lo haci niun cambio na nos Statuut, pero si na e interpretacion di su contenido, y esaki siguramente mester keda resolvi.
Pero na e momento aki mi ta wak mi co-ciudadanonan y nan famia prome, mi prohimo y con nan lo mester surpasa e crisis aki – esey ta locual tin mi atencion na e momentonan aki, pasobra sin nan capacidad di contribui lo no tin posibilidad pa restaura nos Pais.
“He that fights and runs away, May turn and fight another day; But he that is in battle slain, Will never rise to fight again.”
— Tacitus
“Esun cu bringa y core bay, por dal un buelta y bringa un otro dia. Pero esun cu perde su bida den bataya, nunca lo lanta bek pa por sigui bringa”
— Tacitus
