Parlamentario Hulandes ta desea duna islanan derecho di voto na Hulanda; Den cuadro di ampliacion di voto pa Hulandes den exterior

Segun e portal dossierkoninkrijksrelaties.nl recientemente e parlamentario di Tweede Kamer Laura Bromet di Groenlinks a boga den debate pa duna e ciudadano Hulandes di Aruba, Curaçao y Sint Maarten derecho di voto pa Tweede Kamer di Parlamento Hulandes.

Esaki durante e debate den cual tabata discuti e cambio di constitucion Hulandes proponi, unda ta desea di duna derecho di voto pa eleccion di Tweede Kamer na tur ciudadano Hulandes cu ta residencia den exterior.

Segun Bromet, e Hulandesnan cu ta biba den e otro paisnan di Reino, cu ta e tres islanan menciona, no tin derecho di vota pa Tweede Kamer, otro cu esnan cu ta biba na Hulanda o ta biba den exterior den otro pais. E ta di opinion cu e ciudadanonan ey tin interes grandi den bon legislacion di Reino, bon maneho di asunto di exterior y maneho di defensa, pero nan no tin derecho di voto ni pa Eerste, ni pa Tweede Kamer. Parlamento (Hulandes) ta trata e asuntonan aki como si fuera un parlamento di Reino,” segun Bromet, tambe na nomber di fraccion di PdvA.

“Nos ta lesa cu alegria den e acuerdo di gobernacion (Hulandes) cu ta bay elimina e deficit democratico (‘democratisch tekort’) den Reino dunando e paisnan Caribense un voto proporcional den caso di proyecto di ley di Reino. Esey ta bunita, pero poco concreto ainda.

P’esey mi lo kier tende di e ministro kico e propuesta aki ta encera concretamente y riba cual termino (Tweede) Kamer lo tende mas di esaki. Banda di esey mi lo desea di haya di e ministro e compromiso cu den e voto aki, cu mester haya forma ainda pa e paisnan Caribense, lo tira un vista riba e papel di tanto Tweede como Eerste Kamer. Si nos tin un parlamento cu ta consisti di dos camara, anto e habitantenan di e otro paisnan mester por tin influencia tambe riba ambos camara di nos parlamento.”

Ministro di Asunto Interior y di Reino Hanke Bruins Slot a responde riba e ponencia di Bromet, cu a haci su intervencion tambe na nomber di sra Khadija Ariba di PvdA, a reconoce cu tin tal frase formula den e acuerdo di gobernacion, pero a indica cu e concretisacion di e intencion aki ta den e cartera di su secretario di estado pa asunto di Reino y Digitalisacion, Alexandra van Huffelen, cu lo ta encarga cu informa Tweede Kamer mas acerca di e concretisacion di e propuesta aki.