Un ley cu a keda casi 22 aña den lachi, awe a mira luz di dia bou encargo di e Parlamento number dies. Cu hopi orguyo awe nos a sostene e ley di control di financiamento di partido politico, cu nos coleganan Edgard Vrolijk y Rocco Tjon a presenta. Un ley cu ta cuadra cu e vision di nos prome minister y e Gabinete Wever-Croes cu ta carga e bandera di integridad.

Indirectamente un ley cu lo por hasta cuminsa limita e campañanan luhoso cu nos a bini ta mira den pasado, y deroche di placa pa gana voto di nos ciudadanonan, sin cu e politico ta basa su mes ariba contenido real. Pero mas importante cu introduccion di e ley aki ta, Aruba ta wordo fortifica como un Estado di derecho pasobra ta bini un grado mas halto di transparencia y tambe un ‘level playing field’ pa loke ta trata politica local den su totalidad. Mas ainda e ta un ley cu ta segun reglanan internacional y tambe segun reglanan den Reino Hulandes.

Parlamento a pasa leynan hopi importante e siman aki

Dia 9 di september 2020 Parlamento a aproba e Ley di Ombudsman, conoci tambe como e ley di Defensor di Pueblo cual meta ta pa brinda apoyo na e derechonan di tur ciudadano den nos comunidad y duna sosten na esunnan cu ta wordo perhudica pa e burocracia cu nos a bini ta conoce den gobiernonan.

Dia 10 di september 2020 Parlamento a aproba e ley di financiamento di partidonan politico, cu si e tabata vigente den e Parlamentonan anterior, ta un ley cu lo por a evita casonan di corupcion cu Aruba a bini ta conoce na man di politiconan. Nos a conoce e caso di ex minister di AVP cu pa motibo di fraude y donacionnan politico a hay’e den problemanan basta grandi y cu a wordo condena pa esaki. Y awe tin ex ministernan cu ta bou di investigacion pa motibo cu nan a comete actonan fraudulento y di corupcion y tambe tin pruebanan cu e.o. nan a haya donacion y a duna tereno di pais a cambio.

Cambio ta un proceso

Nos a priminti cu lo trece un cambio. E ley aki cu ta reglamenta financiamento pa partidonan politico, pero tambe pa un candidato riba un lista politico, cu ta haya e.o. sponsor of donacion sigur lo ta ilustra e cambio aki. Awor politiconan no por sconde mas tras di donacionnan cu no por splica di unda nan a bini pa hiba campañanan luhoso, y sigur esaki lo contribui pa frena patronahe politico. A incorpora un comision nobo y independiente cu lo controla e exigencianan cu ta pone riba partido politiconan y e comision por hasta duna sancion cu si partidonan politico no cumpli. Partidonan lo tin na registra nan actividadnan cu ta genera placa, donacionnan, benta y lo tin di duna un relato financiero anual y lo mester ta controla pa un accountant. A pesar cu hopi Parlamentario na principio no tawata di acuerdo cu introduccion di e ley aki. Tin di bisa cu mediante e ley aki Parlamento ta fortifica e caminda cu Gabinete Wever- Croes a scoge pa cana di integridad, bon gobernacion y combati corupcion. Alabes e ta limita campañanan luhoso politico, gastonan astronomico cu politiconan ta haci pa gana voto, y cumpramento di voto. Pero mi ta convenci cu e lo eleva e nivel di politica pa gana voto traves di contenido, debatenan y programanan cu ta saca Aruba pa dilanti concretamente y na un forma duradero.

Conclusion

Nos di Parlamento number 10 a haci esaki pa restaura e confiansa den politica local y hisa e nivel di politica en general. Nos tin di scoge entre duna transparencia of garantisa privacidad di esunnan cu ta haci donacion. Pero cu si nos kier pone un paro na corupcion, nos tin di scoge pa transparencia pa por garantisa bienestar y bon gobernacion di nos Pais.

Nos no a yega ainda unda cu nos tin di ta, pero cu e ley financiamento di partidonan politico, e Parlamento aki ta sigui frena y cambia e manera con partidonan y candidatonan ta hiba campañanan Aruba, Tevreden a termina ta bisa.