Ta tristo pa mira cu Ricardo Croes ta bini dilanti y ta haci como si fuera cu parlamento kier tuma credito pa un decision cu a ser tuma den ministerraad pa loke ta trata enseñansa. Den ministerraad ta ministernan di MEP, ministernan di POR y pa recorda Ricardo, e minister di RED ta sinta, no parlamento! Esey ta nifica cu minister Lampe ta bon na altura di decisionnan cu ta wordo tuma entre e y su coleganan, y si acaso cu e no ta di acuerdo e lo por haci esaki conoci tambe den ministerraad.
Despues cu minister Lampe a wordo yama den parlamento (openbare bijeenkomst) y a wordo conseha pa e bay bek y dialoga cu e docentenan di SPO y Traimerdia y a tarda pa haci esaki, mi a tuma riba mi mes pa haci e bishitanan personalmente.
Ami no ta kere cu docentenan tin di drenta vakantie sin tin claridad riba kico ta bay pasa ora cu scolnan habri bek. Y mi ta kere cu ta hustifica, pa sa nan situacion na scol y ta p’esey a bishita nan, a pesar cu nos a scucha e docentenan di Traimerdia y SPO na parlamento.
Ami no sa ta cua baca Ricardo kier gaña (referiendo na su articulo den Mas Noticia 1 july ’19) pero cu si ta di aña pasa e minister ta tin e plannan aki, anto e ora pakico e docentenan a acerca parlamento cu nan preocupacionnan? Ami ta kere cu Croes tin di ta mas serio den su expresionnan. Pasobra si acaso cu e minister ta tin e decision wanta pa un aña caba, anto ta ki dia e ta tin e intencion di informa e docentenan?
Cu Traimerdia ta bay cay bou di ministerio di Asuntonan Social, no ta mi decision, ‘decisionnan cu ta wordo tuma den ministerraad no ta na disposicion di parlamento’.
Pero si, mi ta contento y ta sostene e decision aki. Pasobra tur trahado di Trai merdia merece trankilidad den nan trabou.
Y si ta asina cu nan a wordo paga sin base huridico ta keda na e minister di asuntonan social cu ta nan minister awor pa regla esaki mas lihe posibel pa nan.
