E realidad di full e situacion rond di Citgo ta cu e compania ta absoluto y no tin forma pa paga nada mas. No ta solamente un situacion cu ta pasando cu Aruba pero nan fondonan rond mundo ta congela, sin kita afo cu hopi di su funcionarionan a wordo cera pa motibonan di fraude. Ademas e realidad amargo di e situacion na pais Venezuela ainda no a mehora, cual tambe ta haci hopi dificil pa por haya fondo pa nan cumpli cu e contracto y nan obligacionnan. Peor ainda momento cu OFAC (Office Foreign Assets Control di USA) a pone sancion riba nan, a haci dificil pa nan yega na fondonan. Tur esakinan a afecta e rehabilitacion di e refineria na Aruba for di 2016 y ta rason cu pa cuater aña Aruba no a mira trabou na gran escala tuma luga.

For di prome kwartaal di 2019 Citgo a informa gobierno cu nan no por cumpli mas cu nan obligacionnan y kier yega na un ‘Temporary Suspension and Transfer Agreement’. Na mesa no a logra sali afo y a bay over na un ‘Termination Agreement’.

Gobierno a forsa Citgo pa cumpli cu tur su empleadonan segun ley y tambe cu belasting unda a paga 28.8 miyon. Sumando cu Citgo no a opera den e 4 añanan cu a pasa, no por paga lease na RDA, y no por renoba e planta, e pregunta ta keda, kico ta warda pa termina anto?

Contracto firma pa Eman y De Meza.
Bou di gabinete Eman ariba 10 di juni 2016 a firma cu Nelson Martinez cu ta representa Citgo Aruba Holding, Citgo Aruba Refinery y Citgo Aruba Terminal. Un combenio unda PDV Holding a duna: 1) Un suma di 150 miyon dollar pa ora di desmantelacion, 2) A elimina claim ambiental (AB 2016/50) di Coastal, El Paso y Valero desde 1989 te cu 2016, 3) A duna garantia pa cualkier incumplimento di banda di RDA na Citgo, Citgo lo por claim Pais Aruba te cu 300 miyon dollar Un contract cu a pone Pais Aruba den un desbentaha grandi y a pone Aruba den un riesgo hopi grandi.

COVID- 19.
Si Aruba no yega na e ‘Termination Agreement’ awor, ta keda un insiguridad hopi grandi y riesgoso. Pesey ta importante pa splica e incertidumbre tocante e 150 miyon dollar di garantia cu PDV Holding a duna. E suma aki no ta cu PDV Holding lo paga Pais Aruba si tin un incumplimento di contract. Tampoco no ta un suma cu nan ta debe Pais Aruba. Solamente si Citgo no cumpli cu su obligacionnan y si Aruba haya rason den corte internacional lo tin un posibilidad ariba e 150 miyon dollar. E proceso aki lo por dura alrededor di 5 aña, sin cu tin un garantia cu lo cobra e suma di 150 miyon dollar na final debi na e tantisimo sancionnan cu tin riba Citgo y PDV Holding.

Mirando cu Aruba ta depende di turismo solamente te cu awor y cu e crisis mundial di Covid-19 ta futuro pa Aruba, ta prudente pa e refineria y of terminal haya un operador nobo y habri mas pronto posibel pa asina por tin un segundo pilar economico pa yuda saca nos Pais di e crisis aki y pa nos por tene cabes riba awa te ora cu turismo lanta cabes mundialmente.

Direccion nobo.
Nos por drenta e direccion nobo solamente cu un vision nobo. Nos tin di termina e contracto actual cu Citgo pa por yega eynan. Nos tin di haya e facilidad mas lihe posibel pa evita cu e refineria ta sigui deteriora y bay perdi. Aruba tin di recupera e control ariba su tankinan di terminal. Y habri negociacionnan cu otro interesadonan pa por yega na haya un operador nobo.

Esaki lo por mustra awe cu nos ta perde, pero futuro lo mustra cu esakinan ta e pasonan cu lo hiba Aruba pa gana, parlamentario Tevreden a declara.