Benny Nisbet of e politico documenta manera e tawata wordo yama, tabata ex minister y ex parlamentario pa Pais Aruba. Sin embargo tambe e a sirbi como miembro di eilandsraad. Un politico cu semper a studia su materia hopi bon y tabata documenta su mes sublime pa por hiba discusionnan cu argumentonan serio.

Awe nos a rindi atributo y a desea su señora Natalia Nisbet, Sandra Nisbet, Rose Nisbet y henter famia, hopi forsa cu e perdida aki.

Tres perdida grandi pa San Nicolas

Hopi hende ta mira solamente color politico o despotanan cu nan ta tin den pasadoora ta trata cu politiconan o baluartenan. Sin embargo tin di crece como ser humano y surpasa esaki pa duna balor na figuranan y baluartenan cu a yuda fortifica y grandese bo Pais cu nan dedicacion, experiencia y talento.

Personalmente ta cu duele na mi curason mi a mira tres pilar di e districto di San Nicolas wordo hiba na nan ultimo luga di sosiego den e final aki di aña 2020.

Sr. Crispin Bruce, Sr. Eric Nassy, y awe Sr. Benedict Nisbet. Nan ta tres perdida grandi pa San Nicolas y ta laga un gran bashi cu tin di wordo yena awo pa e generacion cu ta sigui.

San Nicolas ta unda mi a duna mi aporte como profesional traves di hopi aña, y mi ta agradecido di por a haci esaki y pa tur loke mi a siña den e trayectoria aki.

Mi tin un aprecio grandi pa e districto y su hendenan y lo desea di mira lidernan nobo lanta cabes pa sigui avansa su hendenan.

Nos ta drenta un era nobo

E pandemia a obliga nos como ser humano pa evalua nos situacion actual como Pais. No solamente nos situacion financiero si no tambe nos bienestar social y emocional. Nos tin di drenta un era nobo unda nos ta fortifica nos principionan como Pais. E principio di yuda bo prohimo manera Sr. Eric Nassy (dfm) tabata haci tur weekend traves di platonan di cuminda pa centenares di ciudadano den necesidad. E principio di educa un generacion pa para firme pa su derechonan manera Sr. Crispin Bruce a haci traves di enseñansa. E principio di duna respet hasta ora bo ta den desacuerdo cu bo contrincante, uzando argumento manera cu Sr. Benedict Nisbet a haci cu su forma di hiba politica.

Ta mi deseo cu e perdida di e baluartenan aki, siña nos tur pa duna mas di nos mes na cosnan positivo pa nos Aruba por sigui crece. Mi kier yama danki na e baluartenan aki pa a sirbi Pais Aruba cu tanto dedicacion y fervor. Cu nos Creador sigui duna nan famianan e forsa necesario den e dianan nos dilanti.

Y cu nos drenta un aña nobo cu un bista diferente como Pais Aruba, Tevreden a termina bisando.