Parlamentario Hendrik Teverden(MEP): ‘Ta consehabel pa Aruba cera tur frontera e simannan nos dilanti’

Parlamentario Tevreden ta di opinion cu tin di cuminsa prepara pa cera frontera pa bishitante di Merca tambe.

Siman pasa dia 11 di maart 2020, WHO a proclama e corona virus como un pandemia. Pandemia simplemente ta nifica cu e virus awor a plama y ta den multiple Pais mundialmente na e mes momento, riba 112 pais awor caba. Den e ultimo dos simannan e casonan a multiplica 13 biaha y locual cu ta hacie asina preocupante ta cu algun Pais no a tuma e precuacionan necesario of a tuma nan mucho laat.

Aruba, apesar di ta un isla chikito, a actua den un forma relativamente lihe. Nos tin di remarca cu minister di Salubridad a maneha e caso den un forma sublime, y awor cu e situacion a escala na nivel nacional, e ta pasa den man di minister Presidente Wever Croes, kende sin duda cu esaki lo continua tuma e pasonan necesario.
Naturalmente tin di subraya y yama danki na tur nos profesionalnan, cada un den nan propio ramo cu a bin ta haciendo un trabou riba nivel y standard internacional. Nos ta un isla bendiciona.

Persona contagia cu e virus

Diabierna ultimo nos a registra Aruba su prome dos casonan di corona virus (COVID19). Si nos analisa con e virus ta comporta y tambe con lihe e por plama, lo ta prudente pa amplia e restriccionnan na nos fronteranan. E dos personanan contagia a bini di Merca, y nos no sa cuanto bishitante di Merca por ta contagia. Merca ta e grupo di mas grandi cu ta bishita nos isla y hustamente esaki por ta un peliger pa nos ciudadanonan.

Tin di remarca si, cu ya caba minister Presidente a tuma e pasonan preventivo pa cera scolnan, cancela tur actividad publico y priva, a cera frontera cu Europa, y a prohibi bishita na nos casnan di cuido cu ta e grupo mas vulnerabel.

Un decision hopi dificil

Si cera frontera e lo sirbi pa duna nos dunadonan di cuido e espacio pa atende esunnan contagia y sigura mas tanto posibel cu e virus no sigui plama. Como cu sintomanan di e virus ta tuma algun siman pa por presenta nan mes cerca un cargado. Unabes cu tin siguransa cu Aruba tin e casonan bou control, lo por habri frontera cu control pa evita cu personanan contagia lo bolbe drenta.

Sinembargo no por cera wowo pa e realidad, cu un decision asina lo tin consecuencianan economico grandi. Manera ta conoci e situacion financiero malo cu Aruba a hereda di e gabinete anterior a debilita nos finansas publico cu ta haci nos pais mas vulnerabel den momentonan manera esaki. E decision no ta uno facil, sea ta baha nos entrada economico, pa sigura e salud di nos pueblo, o ta scoge pa mantene frontera pa Merca habri, cu tur posibel consecuencia di esaki. Mi no tin duda cu minister Presidente Wever Croes, lo scoge pa pone nos hendenan y nan salud central, parlamentario Tevreden ta termina di bisa.