Na 2020 Raad van State a publica un ongevraagd advies tocante e responsabilidad ministerial na unda ta poni cu tur minister ta finalmente responsabel pa ambtenaarnan cu ta traha bou di nan. Di esaki, parlamentario independiente Gerlien Croes a haya oportuno pa publica e informacion aki y asina cuestiona cu mientras tin un investigacion andando, minister Croes ta bay biaha pa varios dia.

Den e “Ongevraagd advies Raad van State over ministeriële verantwoordelijkheid” presenta pa afdeling advisering di Raad van State na 2020, ta señala cu esaki ta un advies no solicita tocante responsabilidad ministerial y cu e asesoramiento aki kier contribui na fortalecemento di democracia parlamentario y e confiansa di e ciudadanonan pa cu gobierno.

Den e advies aki tambe tin recomendacionnan cu ta indica cu maske no ta existi solucionnan facil y lihe pa resolve e retonan cu ta rond di e responsabilidad ministerial, parlamentarionan, gabinete y ambtenaarnan por traha hunto solamente pa garantisa cu esey ta bay cambia. “Pasobra e regla di responsabilidad ministerial ta mas relevante cu nunca y no por cambia esey,” Thom de Graaf a bisa.

Parlamentario Gerlien Croes a trece e punto dilanti tocante e responsabilidad ministerial den relacion cu e investigacion reciente cu Landsrecherche, bao guia di hues comisario y Ministerio Publico, a cuminsa, denomina “Portulaca,” riba posibel delitonan di corupcion y otro hechonan castigabel relaciona cu otorgamento di permisonan di estadia entre 2020 y 2022.

Manera ta conoci, instancianan hudicial a haci varios doorzoeking, caminda a drenta entre otro, na Bestuurkantoor – specificamente den Ministerio di Integracion, Labor y Energia; ademas na Departamento di Integracion, Maneho y Admision di Stranhero (DIMAS).

Pa e motibo aki, Gerlien Croes a cuestiona minister Glenbert Croes, esun encarga cu e cartera aki, ya cu ayera e minister a bay biaha pa Suisa y Spaña te dia 20 di juni, manera el a sigura. E parlamentario a señala cu “mientrastanto cu e wea ta ariba stoof na candela e doño di cas ta biaha awe tardi bay Switzerland y Spaña te dia 20 di juni.”

Biniendo back riba e advies di Raad van Staten den e punto 2.5 cu ta indica cu no tin responsabilidad sin autoridad, “di kico un minister mester para responsabel? Pakico si y pakico no?”
E contesta na e pregunta aki ta hopi importante, pa motibo cu e responsabilidad ministerial tin vinculo cu e funcion di e minister. Esey ta nifica, por ehemplo, “cu un minister ta responsabel di su accionnan y accionnan di su antecesor.”

Ademas, un minister ta responsabel di accionnan di e funcionarionan cu ta traha bao su ministerio. E tambe ta politicamente responsabel y ta autorisa pa determina tur cos, pero esey no kiermen cu semper ta capaz di pone esey den practica.

Den e rapport ta bisa lo siguiente: “In dat verband wordt wel gesproken over de ‘fictie’ van deministeriële verantwoordelijkheid. In verband met deze fictie is in het verleden wel het standpunt ingenomen dat de ministeriële verantwoordelijkheid niet verder strekt dan wat de minister zelf heeft gedaan of verwijtbaar heeft nagelaten. De gedachte hierachter was dat het niet redelijk zou zijn om de minister de fouten van zijn ambtenaren toe te rekenen als hij daarvan niet op de hoogte was en hoefde te zijn – en hem dus persoonlijk geen verwijt treft. Dit standpunt is tot nog toe altijd afgewezen. Het zou een belangrijk deel van het ambtelijk handelen buiten de ministeriële verantwoordelijkheid plaat- sen en daarmee de mogelijkheid van parlementaire controle op onaanvaardbare wijze inperken. Algemeen aanvaard is daarom dat de minister over alles wat onder zijn leiding binnen de ambtelijke organisatie plaatsvindt, verantwoording behoort af te leggen en ook degene is die zo nodig maatregelen neemt om de gewenste veranderingen in het beleid en/of de uitvoering door te voeren.”

Tambe ta importante pa menciona cu Gobierno di Aruba a manda varios comunicado pa prensa, indicando por ehemplo cu “minister Croes a tuma e cartera di integracion na November 2021, cu e meta pa traha na combati corupcion den e departamentonan bou di su encargo, pero specialmente den e proceso di otorgamento di permiso na esnan cu ta cumpli cu e rekisitonan. Pa e motibo aki, el a instrui na e departamentonan concerni, pa duna ful cooperacion na e investigacion cu Ministerio Publico ta haciendo. Tambe, e mandatario ta confirma su pleno confiansa den e imparcialidad, eficiencia y efectividad di e investigacion di Ministerio Publico, pasobra ta asina so lo por duna claridad na dudanan, erornan cu ta wordo cometi.”

Ademas, a indica cu “mester enfatisa cu na momento cu Gabinete Wever-Croes a drenta gobernacion, un di e prioridadnan tabata pa combati corupcion den e departamentonan y procesonan di gobierno y cu p’esey na momento cu minister Croes a tuma e liderazgo di e cartera di Integracion, a bin cu un maneho nobo y mas humanitario, na unda a trece cambionan den e proceso di otorgamento di permiso. E ta obvio si cu na momento cu a cuminsa exigi integridad, eficiencia y transparencia den e proceso di duna permiso, e no a cay na agrado di tur hende. Pero mi ta kere cu e bon conducta, e bon proceder di nos departamentonan, implementando e maneho cu mi ta hibando, nos lo sa di vence y sirbi e interes di nos pais, minister Croes a expresa.”

Nan a señala cu un di casnan cu landsrecherche a bishita ayera relaciona cu e investigacion, ta cas di e mama di Minister Croes, na unda e fundacion ‘Union ta Forsa’ cu a wordo reactiva pa campaña 2021 y cu despues di eleccion ta inactivo. “Ta importante tambe pa tuma nota cu e señalamento di personanan y/of empresanan, no tin nada di haber cu e fundacion cu a wordo lanta pa minister Croes su campaña.”

Di su parti, anterior minister encarga cu e cartera di Integracion, Andin Bikker tambe manda na medionan local un reaccion di su parti informando cu “mi kier a expresa di ta hopi sorprendi di e articulo den 24ora.com referente e investigacion yama Portulaca. Mi persona nunca a yega di firma permiso pa peticion di e ley di Admision (LTU), Dimas semper tabata tin mandato pa esaki via e sistema di aplicacion automatisa SIRSA y tabata opera segun e maneho publica riba su website. Mi no sa detayenan di e investigacion, en todo caso mi ta na ordo di Ministerio Publico si meste cualkier clarificacion. Mi a sacrifica pa sirbi mi pais pa medio di un trayectorio politico di mas cu 20 aña cu honor y frenta na halto.”

En todo caso, mester laga e instancianan hudicial haci nan trabou di investiga debidamente pa asina nan lo por resolve e investigacion aki y si ta e caso, presenta pruebanan pa esnan responsabel lo duna cuenta na husticia.

Rapport aki di Raad van State ta disponibel riba pagina di Facebook di Bon Dia Aruba.