Ayera den Parlamento di Aruba a trata e ley di RWZI conoci como ley di Bubaliplas caminda parlamentario independiente Gerlien Croes a trece dilanti su preocupacion pa loke tabata sucediendo den Parlamento y ademas a haci declaracionnan contra prome minister Evelyn Wever-Croes.
Ta conoci for di basta tempo e problema y e retonan cu e planta di Bubaliplas tin caminda mester busca un solucion mirando e desaroyo cu Aruba ta bin hayando den ultimo añanan por ehemplo, cu construccion di mas casnan y hotelnan.
Pa esaki, Gerlien Croes a duna un declaracion pafo di Parlamento mientras e tratamento di ley tabata tumando luga caminda el a bisa cu “e ley aki a drenta Parlamento di Aruba y a bin cu un conseho di Raad van Advies unda Gobierno di Aruba ta pidi na Raad van Advies, pa por fabor trata e ley aki cu urgencia, Raad van Advies ta cuestiona e hecho cu despues di seis aña cu nos tur sa cu e problema t’ey, aworaki boso kier pa nos haci nos trabou den pura, akinan e red flag ta cuminsa sali di pakico Gobierno ta manda e ley cu urgencia y kico tin tras di esaki,” el a bisa.
Lo cual cu Gobierno a presenta den parlamento ayera segun Croes a señala, ta pa Utilities Aruba N.V crea un compania nobo cu ta bay maneha Bubaliplas, e compania nobo aki a bin Parlamento di Aruba cu un presentacion y a bisa na parlamentarionan cu e aspecto financiero di e proyecto aki tin hopi inseguridad, “awor con bo ta trece un ley pa nos na Parlamento di Aruba y bisa nos cu e proyecto ta hopi insigur, cu bo no tin e hendenan capaz pa bay traha den e compania y sin mas, presta 148 miyon dollar pa bo purba haci e proyecto aki, como parlamentario ta nos deber pa nos bay haci nos investigacion y informa comunidad di kico ta pasando na e momentonan aki.”
El a bisa cu el a haya un declaracion recien haci den un medio local, esta Bon Dia Aruba, caminda no solamente tin 148 miyon dollar cu ta bay tin mester pa inverti den esaki pero tambe mester 4 miyon florin pa inverti y asina conecta Hotel Secrets di baby Beach cu RWZI di Zeewijk manera Bon Dia Aruba a publica den su edicion di dialuna 20 di mei.
Croes a cuestiona cu e motibo di pakico Gobierno kier pusha y hinca esaki bao di un compania nobo lanta bao di Utilities Aruba N.V cu ta bay presta y cu no sa unda e ta bay haya placa ainda di 148 miyon dollar, e ta puntra su mes kico ta e pura pa ley pasa? y ademas pasa un aansluit di Secrets Hotel di 4 miyon florin cu probablemente pueblo di Aruba tin cu bay paga “eynan e rabo di porco ta cuminsa krul, pasobra ora bo ta bay wak con e prome minister Evelyn Wever-Croes tin asina pura pa e ley aki pasa awe, Three Rivers Real State esun encarga di traha Secrets Hotel tin como managing director Arulex Trust Services N.V, kiermen no solamente prome minister ta crea un compania bao Utilities unda su famia abogado ta representa Utilities y cu tin cu bay gana su comision riba e 148 miyon dollar pero tambe Secrets Hotel no mas y no menos cu e mes ta doño di e hotel aki, e mes ta managing director di Secrets, kiermen pueblo tin cu dunele 4 miyon florin pa conecta Secrets riba e sistema di RWZI pa su hotel por habri, pa cada negociacion e ta bay gana e comision.”
Asina mes, Croes ta señala cu prome minister ta parti di ocasiona e problema y e peso cu RWZI mester carga pa motibo cu ta papia di cambernan di hotel “pero e no ta bisa cu Arulex Trust Services ta managing director di Iberostar Hotel kiermen eynan tambe e tin un comision pa haya, pura shonnan boso tin cu pasa e ley pasobra eleccion ta otro aña y mi tin cu gana comision riba 148 miyon dollar cu mester bay fia comision riba Secrets cu tin cu habri, pero tambe mi tin cu gana comision pasobra mi tambe ta managing director di Iberostar Hotel, Iberostar na 2019 den su contestacion na e parlamentario Marco Berlis durante su preguntanan ta bisa cu Iberostar a ofrece tuma over e proyecto di Impact Holding N.V, diripiente su famia a haya un oportunidad pa tuma un hotel over y nan a tume, e mes tambe ta causante di e problema cu RWZI pero tambe ta buscando manera pa con traha su miyones cune.”
Croes a publica riba su rednan social Facebook e documentonan di Camara di Comercio (KvK) e cual ta sostene su declaracion, pero ademas di esey den e reunion publico prome minister Evelyn Wever-Croes a señala cu “mi a scucha e parlamentario Gerlien Croes lansa acusacionnan hopi baho mes akiden, tabata manera un pos di riool a rementa y tur e sushedad cu tabata sali di su boca Sr. Presidente, ta di un nivel hopi bochornoso, el a pretende cu e ley akinan a bin pa enrikece a mi y mi famia, pero laga mi bisa di awor caba cu esey ta puro mentira, e ta falso, cu por sali talbes di un persona cu por tin envidia. Mi tata ta un homber di 82 aña, un homber respeta pa comunidad pa lo cual el a haci pa Aruba y pa su carera, ya pa dos aña e ta cu pension y e no tin ni un laso cu Arulex Trust ni cu Croes-Wever-Ruiz.”
Prome minister ta bay entrega keho pa difamacion
Den esaki, prome minister a señala cu ayera mes e lo tabata caminda pa Ministerio Publico y keha Gerlien Croes pa difamacion y cu su caso di rectificacion contra dje “pasobra bo no por gaña di e forma ey, lastra hende y kere cu bo ta gateway cune, awor si b’a bise akiden so cu bo tin e proteccion y inmunidad, mi ta compronde pero na momento bo a comete e kibocacion di ripiti ayafo para duro den bo sapato.” Prome minister a sigura.
Pa finalisa, Gerlien a publica riba su Facebook Page: “Minister president ta desea pa mi rectifica “bise sorry” paso mi a difama su persona door cu su nomber no ta ariba ningun registro di KVK di Arulex. Dus e “no tin ningun laso of beneficio” segun su persona. Laga nos tur kere e berdad aki.”
