Parlamentario Endy Croes(MEP): Solidaridad cu pueblo parlamentarionan y ministernan ta entrega 750 mil

Diabierna mainta Fraccion di MEP hunto cu Fraccion di RED a entrega un Ley na Presidente di Parlamento Ady Thijsen. Nos por corda cu na inicio di siman a trata presupuesto di pais Aruba. Un presupuesto cu tabata enfoca riba un surplus di 46 miyon lamentablemente cu e crisis mundial cu a dal tur hende di sorpresa a bolter e scenario por completo pa un deficit di 1.3 biyon florin.

Minister Presdidente Evelyn Wever Croes a splica den Parlamento cu Parlamentario y Ministernan tur lo bay entrega di nan salario y beneficio y esaki lo bay ta mucho mas cu e proposicion di Afl.3000,- cu tabata riba mesa na e momento ey. Tambe a splica cu nan ta casi cla cu e calculacion final. Parlamentarionan y Ministernan ta sinti y sa cu nan mester ta solidario cu e 25 mil empleadonan cu a perde trabou door di e crisis actual. Diahuebs den oranan di atardi Parlamentario Rocco Tjon y Endy Croes a reuni cu expertonan di minister di Financien y a ricibi e cifranan cual a wordo involucra mesora den e Ley cu tabata cla y inespera di un calculacion y cifra final. Di acuerdo cu e Ley cu a wordo entrega na Parlamento diabierna 27 di Maart 2020, cada Parlamentario lo entrega Afl.25.000 (mil) mientras e suma total cu lo wordo reduci for di Parlamentario y Ministernan como muestra di solidaridad lo ta e suma di Afl. 750.000 (mil) florin.

Parlamentario Endy Croes ta sinti cu Parlamento a cumpli cu su trabou na e manera corecto entregando e ley aki cual pronto lo wordo trata den Parlamento. Alabes e Ley ta retroactivo cuminsando di 1 di April 2020. Pueblo por ta mas trankil como cu tanto Parlamentarionan como Ministernan a duna e ehempel corecto cortando masha hopi den nan propio saco como muestra di solidaridad pa cu pueblo y esnan mas afecta. Parlamentario Endy Croes ta urgi Presidente di Parlamento pa acelera e ley aki pa cana su caminda pa pronto e por wordo trata den un reunion publico. Na es momento Parlamentario Endy Croes ta suplica pueblo pa ban enfoca riba nos salud y ban enfoca pa hunto nos bringa e corona virus cu tin mundo henter y Aruba full geklem. Union ta forsa. Corda cumpli cu e protocolnan estableci. Keda Cas! No shakehands, No sunchi, No brasa otro y tosa den elleboog! Distancia Social manteniendo 2 meter leu di tur hende unda sea cu Bo ta.