ORANJESTAD – Parlamentario Endy Croes ta reacciona riba un conferencia di prensa cu Mike Eman a tene siman pasa. Mike Eman den su intento di sigui manipula a purba hunga sentimental riba e pueblo.

Dado caso Mike Eman ta kere cu pueblo a lubida asina lihe con el a desgracia e pais aki. Mike Eman den su conferencia di prensa a bisa textualmente ”Nos a laga boso cu un  pais cu su economia tabata creciendo na 2.3% y alabes nos a laga boso cu un pais cu su deficit tabata bahando sistematicamente”. Parlamentario Endy Croes cu hopi asombro a scucha esaki for di propio boca di Mike Eman, e persona responsabel pa kibra nos pais financieramente marando nos yiunan na un debe astronomico cu nunca nan a pidi pe.

Indoctrina pueblo cu mentira
Tur rapport a mustra con Mike Eman a laga Aruba. CAft a papia na varios ocasion di e desaster cu Mike a laga atras. Palabranan di CAft a splica cu Mike a endeuda e pais aki unda cada baby cu nace awe tin un debe di Afl. 45 mil florin riba su cabes.

Mike Eman a uza strategia di  Paul Krugman pa keda aumenta debe di un pais ora economia ta den receso. Tanto rapportnan di Banco Central a mustra cu 2015 y 2016 no tabata tin crecemento economico y CAft a splica cu Aruba ta un ‘kleinschalig economie’, pues e sistema ey nunca lo traha. Di unda Mike a resucita siman pasa cu su pensamento cu el a laga Aruba su economia creciendo y deficit bahando? Tur instancia profesional ta fout? Mike so ta bon? Kisas Mike Eman mester pasa haci un checkup na Respaldo. Awe Mike kier bolbe indoctrina un pueblo cu mentira, esta cu el a laga un Aruba atras prosperando.

Pueblo ta corda?
Parlamentario Endy Croes ta haci un apelacion na pueblo pa ora nos topa Mike Eman na cualkier entiero of riba caya puntr’e dilanti tur hende pakico e ta gaña tanto asina y mustr’e riba e hecho cu el a trastorna futuro di nos yiunan marando Aruba na tanto debe.

Pueblo ta corda con Mike Eman a gaña cu e lo “elimina” BBO?  Pueblo ta corda con Mike Eman manera un raton di anochi a hisa e edad di pensioen pa 65 aña? Pueblo ta corda con Mike Eman a presta placa manera loco unda awe pueblo mester paga 219 miyon solamente na interes riba placa presta. Pueblo ta corda con Mike Eman a atraca 142 mil florin di caha di pueblo pa celebra su cumpleaños riba e brug dia 1 di september 2017? Pueblo ta corda con Mike Eman a laga bati un pueblo cu a bay protesta dia 1 di october 2014 momento cu Mike Eman a hisa prijs di awa y coriente? Pueblo ta corda con Mike Eman a grita den parlamento cu ta djis un tiki so mas den “rood” el a manda Aruba? Pueblo ta corda con Mike Eman a grita den parlamento cu e ta orguyoso di e debe y e debe t’ey pa nos tur bay pag’e den futuro? Pueblo ta kere cu un hende asina mester un otro oportunidad pa caba di sink e pais aki? Wel nunca pero nunca mas nos no kier un mentiroso manipulado manera Mike Eman pa destrui e pais aki mas cu ya el a hacie caba durante su 8 añanan di mal gobernacion.