Parlamentario Endy Croes a keda babuca momento cu el a tuma nota cu Richard Arends den un conferencia di prensa di partido AVP a cuminsa cuestiona e maneho financiero di pais Aruba. Richard Arends awor kier cuestiona tambe entradanan cu gobierno actual a logra ricibi den 2018 y 2019. Hustamente un tipo “mafioso” manera Richard Arends, consehero di Mike Eman ta esun cu menos mester trata na bin dilanti riba e tema financiero. Hustamente Richard Arends kende tabata e “mind” di e gobierno anterior y pues e padrino di e desaster financiero y Mega Debe.
Richard Arends a chica y sigui chica.
Richard Arends cu Mike Eman ta esunnan cu a tuma decisionnan descabeya pa hundi e pais aki prestando 2000 miyon florin den 8 aña. Ta mesun duo “perfecto” aki ta esunnan responsabel di a redobla interes di pais unda pueblo di Aruba durante aña 2019 a paga 232 miyon solamente na interes riba placa cu nan a presta. Richard ta compronde cuanto scol por ehempel nos por a construi cu e placa aki? Mester refresca mente di Richard Arends cu mediante su compania Horizon Consultancy el a traha un structura pa chica na forma legal miyones di e pueblo aki. Horizon Company a la “chupa cabra” a ranca 4 miyon di pagadonan di belasting. Mesun Richard Arends aki a conseha Utilities cobrando rond di 500 mil florin y e mesun Richard Arends aki a conseha RDA pa un otro suma di alrededor 500 mil florin. Na final di su conseho di vital importancia tabata ta cu Mike de Meza y Mike Eman a honra Richard cu e posicion di director financiero di RDA cu un salario di Afl. 23 mil pa luna, mas tur sorto di beneficionan secundario. Mas tristo tabata cu Mike de Meza a firma tambe cu esun cu mishi cu Richard of kibra su contract mester pag’e 2 miyon florin. Parlamentario Endy Croes ta puntra su mes ta ki grado di sinberguensura e hendenan aki por tin?
Mas chicamento di AVP.
Banda di acomoda Richard Arends, Mike Eman y AVP a percura pa paga Abogado Sjiemfat 5.3 miyon di pueblo, Patrick Paskel y Speed kendenan a lanta companianan manera paddestoel tambe a cobra rond di 7 miyon. Sumanan minimo di 125 mil tur luna tabata pasa riba nan account. Kico ta e embergadura di trabounan cu por a haci pa e sumanan ridiculo aki? AVP a celebra apertura di Citgo como 3 biaha y den un solo apertura cu DESTRA a malgasta casi 800 mil florin. Awor e “bandoleronan” aki manera Richard Arends kier cuestiona gobierno actual riba su maneho financiero? AVP a laga atras deficitnan di 444 miyon algun aña atras cual na 2019 ya a wordo converti pa un Surplus chikito y lo alcansa 25 miyon Surplus den 2020 hustamente pa paga debenan di Mike Eman y Richard Arends.
Parlamentario Endy Croes ta termina bisando cu ta miho Richard Arends keda leu y no papia mes riba presupuesto of finansas di Aruba como cu hustamente ta Richard Arends ta e padrino di henter e desaster aki. Laga e gobierno aki cuminsa drecha boso desaster den minimo 4 aña. Un cos mester ta cla pa henter pueblo cu nunca pero nunca mas AVP merece un oportunidad. Parlamentario Croes ta termina bisando “loque no sirve se bota”.
