Parlamentario Endy Croes a splica cu dia aden y dia afo e lo percura pa contesta e mentirosonan di AVP cu “e berdad”. Parlamentario Croes a ilustra cu Mike Eman y AVP a traha un retorica y locual Mike Eman papia tur su “carnenan” ta ripiti esaki e siman siguiente. Asina por gara Mervin Wyatt Ras conoci pa su actitud raro den Parlamento ta gañando y mal informando pueblo riba prijs di awa y coriente. Adhunto un potret di un articulo cu Mervin a skirbi recientemente. Mervin a para dilanti entrada di Parlamento y graba e engaño aki. Por mira bon cla con Mervin a pega cu e virus di Mike Eman, esta manipulacion y engaño.
Nunca AVP ta acudi na trabou
Parlamentario Croes a sigui informa cu como Parlamentario Croes a haci preguntanan por escrito na WEB pa asina por adkiri informacionnan real y concreto. Desde 18 di september 2018 el a ricibi e contestanan aki por escrito di WEB. Como cu Croes a uza e canal legal y oficial via Parlamento e contestanan ta drenta bek pa tur Parlamentario y pues Mervin Wyatt Ras tambe a ricibi esakinan desde september 2018.
Si Mervin Wyatt Ras ta a lo menos bin trabou, tira un bista den su postbus na trabou y lesa poco documento nunca pero nunca e lo a risca di trece engañonan barbaro di e magnitud aki dilanti. Pues claramente esaki ta confirma locual semper Fraccion di MEP ta reclama cu Parlamentarionan di AVP nunca ta acudi na trabou pero fin di luna si Mervin Wyatt Ras ta “eerste in de rij” pa cobra su salario cu un cara di coco, anto seco seco.
Aumento prijs di coriente
Adhunto nos ta bolbe publica cifranan oficial di WEB unda por mira por ehempel prijs di coriente tarifa per kWh na 2009 momento cu MEP a entrega gobernacion na Mike Eman y AVP. E tempo ey e prijs tabata Afl. 0.2713 per kWh. Nos por mira na 2012 den apenas 3 aña den Gobernacion Mike y Mervin nan a percura pa un subida unda esaki a alcansa Afl. 0.4080, esta un aumento di 50.4% di prijs di coriente.
Esaki ta e tristo berdad. Na 2017 momento cu pueblo a core cu Mike y Mervin for di gobierno unda AVP a bay atras cu mas di 10 mil voto e prijs cu Mike y Mervin a laga atras tabata Afl. 0.3681(Mira tabel WEB). Pues a hay’e na Afl. 0.2713 (2009) y ta entreg’e bek na Afl. 0.3681 (2017), esta un aumento garantisa pa AVP di 35.7% di e prijs di coriente. Danki Mervin y Danki Mike pa suta pueblo cu prijs di awa y coriente y awe ainda kier gaña pueblo cu boso a rebaha e prijsnan aki. Foei om!!
E tipo y calidad di Parlamentario
Pues ki ora Mike y Mervin bisa pueblo cu AVP a baha e prijs di awa y coriente esakinan ta prueba cu nan ta gaña y hustamente a percura pa esaki subi. Sigui gaña pueblo pero cifra y rapportnan no ta gaña.
Kere cu pueblo no tin boso retorica door en door? Esaki ta conta mescos cu prijs di awa unda den e prome 4 añanan di Mervin y AVP, WEB a conoce 15.5% di aumento di prijs di awa. 1 di october 2014 pueblo a bay manifesta y Mike y Mervin a percura pa Riot Commando bati e pueblo kendenan tabata reclamando e inhusticia. Prohibi pa lubida!! Di e manera aki Parlamentario Croes kier ilustra e tipo y calidad di Parlamentario cu Parlamentarionan di AVP ta, entre otro Mervin Wyatt Ras cu ta converti su mes den un mentiroso hibando un politica anticua di engaño. Nos ta lamenta esaki masha profundo y lo keda corigi mentiranan di AVP cu e berdad tur dia si ta esaki necesario, Croes ta termina bisando.
