Parlamentario Endy Croes a splica cu semper e ta para cla pa desmantela tur e mentiranan y manipulacionnan di AVP. Awe lo trata e topico di salario minimo. Mike Eman y AVP den nan retorica yena cu mentira semper ta uza componentenan manera cu AVP a logra baha prijs di awa y coriente cu 35% cual ta mentira flagrante y esaki ya caba nos a contra arest’e y a prueb’e cu rapport di entre otro WEB cu ta indica entre otro cu prijs di awa a aumenta bou gobernacion di AVP (Mike Eman) entre 2010 cu 2017 cu 35.8%. Esaki ta e retorica di Mike Eman y AVP pa keda ripiti un engaño multiple bes te ora cu pueblo kere.

Mentira y falsedad di Mike
Den e maniobra di manipulacion Mike Eman y AVP ta uza tambe por ehempel e storia cu nan a trece bek Carnaval Cruises y KLM. Asina purba di haci nan engaño creibel basa di bruha un cu e otro. Cual ta e otro practica?

Mike Eman di AVP den su retorica ta hisa benta algo cual kisas net nan a mishi cune pero kier bende manera un logro gigantesco of masha masha grandi. Asina e sinberguensanan y manipuladonan di AVP ta traha. Pues un retorica yena cu mentira y falsedad. Den retorica di Mike Eman y AVP semper nan ta grita “Nos a aumenta e salario minimo”. Parlamentario Endy Croes ta sigui splica cu e gritonan di desesperacion alrespecto Salario Minimo a hacie bira mas curioso y a busca informacion concreto alrespecto.

Compara aumento salario minimo
Ora compara tabel y cifranan di salario minimo desde 2001-2009 (MEP) y 2010-2017 (AVP) bo ta comproba ki tipo di manipulado AVP ta.

Mira tabel adhunto. Desde 2001 pa 2009 bao di gobernacion di MEP salario minimo a subi na 6 ocasion di Afl. 1111.75 pa Afl. 1542.90, pues un aumento di Afl. 431.15 florin den 8 aña cual ta igual na 38.8% di aumento. Si nos compara periodo di AVP 2010-2017, salario minimo a conoce un aumento minimo di Afl. 134.70 florin den 8 aña cual ta igual na 8.7% di aumento. Pues pueblo compronde bon e manipulacion di AVP y mi ta ripitiE pa nos no lubida: MEP a aumenta salario minimo cu Afl. 431.15 florin den 8 aña cual ta igual cu 38.8% mientras AVP cu kier keda “brainwash” cabes di nos pueblo a aumenta esaki cu apenas 8.7%, esta Afl. 134.70 florin den 8 aña.

Ta e  aumento di apenas 8.7% aki di salario minimo Mike Eman y secuasenan di AVP kier bende abo votado como un logro inmenso. Esaki ta forma parti di nan grito di tur ora den nan retorica cu “AVP a aumenta salario minimo”.

Partido AVP corupto y manipulado
AVP kier benta pinda pa bo y bende bo esaki cu ta “lomito” bo ta comiendo.  AVP ta y lo keda un partido corupto y manipulado.

AVP ta keda un partido cu no ta interesa den e pueblo humilde y e homber chikito trahado. Midiendo nan echonan cual apenas 8.7% aumento pa e homber chikito comparando esaki cu 38.8% di aumento bou gobernacion di MEP ta papia cla.

Na Hulandes tin un dicho ta bisa: “spreekt boekdelen”.  Parlamentario Endy Croes kier ilustra con AVP ta manipula y ta pidi pueblo alabes e compromiso pa nunca pero nunca mas duna AVP un voto di confiansa pasobra AVP ta un partido inconfiabel.