ORANJESTAD – Parlamentario Endy Croes a splica cu e ta bastante indigna ora mas y mas documentonan di Lotto ta birando publico y prueba tras di prueba ta confirmando e desaster cu dirigentenan di AVP a haci den Lotto.

Mike De Meza y Mike Eman tabata esunnan cu a nombra activistanan di AVP den directiva di Lotto. No obstante locual nos lo trece dilanti awe nos mester culpa tur e miembronan di directiva kendenan ‘willens en wetens’ a coopera y tur tabata tapa pa otro. Investigacion mester bin y esunnan cu a malgasta placa di Lotto lo mester paga bek of lo manda afpakteam pa nan.

Ramiro “Reo”  Thonissen, e ex presidente amigo personal di Mike de Meza y Mike Eman a wordo nombra como presidente di Bestuur na november 2009. Nos tur por corda con nan a malgasta mas di 2 miyon florin di fondonan di deporte pa investiga entre otro mi persona. Awe como Parlamentario nos tin derecho di haci pregunta lesando reglement van orde y staatsregeling y aunke e avepistanan den bestuur kier play astuto y no ta contesta minister nos ta yegando poco poco mas cerca pa pueblo por compronde e desaster en realidad.

Si Mike Eman y Mike de Meza no a worry ni cu pais Aruba y a redobla e debe ta kico por spera di nan pa cu Lotto? Si Benny Sevinger kende ta na beurt awor, despues di Paul, a grita den parlamento I don’t give a damn? Ta bisa nos hopi. Reo Thonissen a haya ta bon cu sosten di henter e directiva pa huur un v- wagen number V222 y a core lunanan largo cu esaki riba cuenta di Lotto. Mientras muchanan ta bende rifa pa por biaha y representa Aruba e atracadonan di AVP tabata chica e baca cu bendicion di ex ministernan di AVP. Lotto a paga Afl. 28.728 florin pa “shon” Reo Thonissen keiro. Sinberguensa ta keda poco.

Keda pendiente pasobra den e dianan nos dilanti nos lo keda publica un cantidad di “robonan” cu a tuma luga den Lotto y investigacion “mester” bin.  Benvinda Da Souza kende pa 9 aña largo tambe a abusa di fondonan di Lotto a core entrega su retiro recientemente. Miedo a cuminsa coy curpa? A kere cu por keda abusa pa semper? Nan mes lo basha abou riba otro momento cu e cayente di investigacion coy nan curpa y mi no ta mira cu nan lo por scapa di e abusonan aki.