Parlamentario Endy Croes a amplia riba e reunion publico di diahuebs ultimo unda a trata presupuesto di DOW 2020. Reunion a bay basta largo y a termina te despues di 10pm. Minister di Ruimtelijk Ordening, Infrastructura en Milieu Marisol Lopez Tromp a defende su presupuesto na un manera magnifico den compania di Director di DOW y demas Hefenan di departamento dunando splicacion amplio cu bon contenido riba cada punto unda finalmente Parlamento a aproba e presupuesto di DOW pa aña 2020.
A haci hopi pregunta riba Riool Water Zuivering Installatie RWZI Bubalie:
Parlamentario Endy Croes y diferente otro colega a haci hopi pregunta alrespecto RWZI. Riool Water Zuiverings Installaties ( RWZI) cual ta e planta situa na Bubali( Bubaliplas) cu ta ricibi awa sushi di tur e hotelnan y e area eybanda y ta trata esaki den nan sistema unda finalmente e awa ta sali hopi limpi y por uze pa mantene landscaping etc. E planta ta existi 48 aña. Ultimo añanan y sigur den 2019 por a tuma nota di masha hopi holor desagradabel den cercania di e planta aki cual tabata causa masha hopi molester na hotelnan den vecindario por ehempel Amsterdam Manor, La Cabana pa nombra algun. E planta ta diseña pa un capacidad di 4500M3 di effluent ( waste water) pa dia. Segun rapportnan entre otro di TNO di April 2018 cu e planta aki tabata ricibi mas di 8600m3 di waste water pa dia pa procesa y pues consecuentente tabata draai dobel di su capacidad. Tur esakinan pues overecapacity y man den man cu tiki inversion combina cu mantencion pober tabata rason di entre deterioro di e planta cual ta produci holornan insoportabel den e area. Awor den corona virus crisis e Hotelnan a “shutdown” por a tuma nota cu e cantidad di awa sushi pa procesa a baha di 8600M3 pa 3000M3 pa dia. Pues por conclui cu Hotelnan ta usa mas cu 5000M pa dia y pues mas cu e capacidad original di e planta.
Parlamentario Endy Croes a puntra Minister si no ta e momento corecto pa pensa riba un sistema innovativo cu un tecnologia mucho mas moderno, eficiente y cu por produci awa pa nos cunukeronan na un prijs sostenibel y mucho mas barata. Tambe a pidi Minister pa considera sea privatisa esaki of inclui Hotelnan pa nan inverti minimo 65% den e proyecto aki cual ta ekivalente di nan propio uso. Mester corda cu pa mas cu 30 aña Hotelnan ta usa esaki sin ningun pago y awor cu Pais Aruba ta den situacion dificil ta e momento pa e multinacionalnan aki duna di nan parti y haci inversion necesario den algo cu nan mes ta usa tur dia. Asina duna muestra di solidaridad y aprecio na e pais cu nan ta haci negoshi y genera ganashinan grandi. Tambe mester pensa riba un diseño di un capacidad mas grandi. Minister den su ronda di contesta a garantisa di lo cana e caminda corecto incluyendo e Hotelnan den e proyecto aki. Minister a informa cu un planta nobo lo costa 25 miyon florin y pa drecha esun existente tin un costo di 13 miyon mara na dje. Finalmente a bolbe pidi Minister Marisol Lopez Tromp pa considera un planta di tecnologia moderno, eficiente unda Minister a reafirma cu Parlamento por conta cu ta den e liñanan aki lo busca e solucion. Parlamento na final a keda hopi satisfecho cu tur e contestanan di Minister y a bay over na aproba presupuesto di DOW 2020.
