ORANJESTAD – Parlamentario Endy Croes ta keda indigna riba e caso di Lotto pa Deporte. Ultimo simannan nos box a yena cu masha hopi informacion cu documentonan na cantidad. Tin biaha bo ta para keto y puntra bo mes si e hendenan aki por tin deporte na curason?

Wel danki na Mike Eman y Mike de Meza cu ta esunnan responsabel pa nombra activistanan di AVP den dicho bestuur. Hendenan manera Reo Thonissen, Arnold Legrand, Benvinda da Sousa casa di Desire riba lista di AVP, Eli Kock man drechi di Mike y ex candidato di AVP, Silvio Janga un pensionado AVP raha kende ta e actual Voorzitter y mester bay para duro pa locual ta bay bin pe, Anthonuis Kamperveen un taxista amigo di Mike Eman, Flavio Faneyte hefe den Elmar cu ta hungando hasta cu credibilidad di Elmar. Kico ta e confiansa cu Elmar por tin den un hefe asina aki cu ta forma parti di e banda di corupcion den Lotto? Destefano Wernet kende a drenta poco mas laat den añanan 2012 kende actualmente nos por a compronde cu ta riba schorsing.

Malgastamento di placa Lotto
Siman pasa nos por a mustra cu prueba di rapportnan oficial con Bestuur di AVP cu ta maneha Lotto a malgasta mas di 1 miyon florin den aña 2010 y 2011 na amigonan abogado pa investigacion.

Banda di esaki nan a gasta 1.5 miyon na companianan cu a haci tur sorto di investigacion den un persecucion politico riguroso. Un total di 2.5 miyon di placa di nos deportistanan a keda comproba cu Bestuur di AVP a malgasta. Pueblo por imagina cuanto cancha deportivo por a wordo drecha y cuanto por a  haya luz y cuanto deportista por a wordo yuda? Dieptriest! Esaki ta e maneho cu Mike Eman a para pe.

Mismanagement total
Den nos postbus a cay tambe poco trabaonan di administracion di Lotto di aña 2014. Banda di e 2.5 miyon cu nan a malgasta den 2010 y 2011 awe nos lo publica pagonan di abogado den aña 2014.

Fiesta cu Da Sousa y amigonan di AVP manera Kloes, casa di Baba Herde pa nombra algun a continua. Un otro suma di Afl. 238 mil florin a wordo gasta na abogado sin menciona Profesionele Hulp unda tin un booking di Afl. 288 MIL florin. Banda di esaki tin un otro suma di Afl. 236 mil paga na Ernst & Young pa cu 2014.  Analisando esaki un suma Afl. 760 MIL cual ta placa cu ta pertenece na Deporte a bay pa amigonan di AVP. Un Mismanagement total ta tumando luga den Lotto pa Deporte.

Nos tin hopi mas y keda pendiente pa Federacionnan y Pueblo di Aruba poco poco compronde unda bo placa di Lotto a bay. Tik Tok Tik Tok!!!! Tin hende lo mester bay para responsabel pa tur e gastonan descabeya asina.