Parlamentario Endy Croes ta splica cu e ta haya “berebere” como Parlamentario momento e scucha un ex minister corupto manera Mike de Meza cuestiona nos Minister Presidente actual alrespecto di Citgo. Mester recorda Mike de Meza cu ta e mes a splica den un corant local riba frontpage cu tur cos ta cla pa cuminsa desmantelacion di e refineria.
Si no tabata pa MEP cu esfuersonan en realidad di Glenbert Croes y ora “0” awe refineria lo a pasa pa pasado. Mike De Meza a sinta negocia cu un Board di CITGO cual tur ta cera awe y a cera un contracto desbentahoso pa Aruba di cual te awe nos ta pega cune. Trabaonan grandi ta wordo haci pa libera Aruba sin cu esaki lo costa pueblo pero sigur ta un materia complica cu no ta bay facil. Ohala prome cu fin di e aña aki lo tin claridad pa asina e gobierno aki por negocia un contracto drechi pa cu un posibel refineria pa futuro.
Contracto di tortura
Mike de Meza despues di a bay Houston un cantidad di biaha, “wine and dine” hunto cu Richard Arends cu e hendenan aki, a firma un contracto di tortura pa pueblo di Aruba. Nos por corda tambe con Mike Eman cu un Team a bay firma cerca Maduro. Mike de Meza no a keda te aki pero tabata manera un man drechi pa un tal Raul Baradat. E cabayero aki ta un di nan cu tabata deep deep envolvi den Man Camp. Tambe Mike de Meza por splica pueblo kende ta Surendranath Chuckaree? Esaki ta un right hand di Mike de Meza? Man Camp, un proyecto di 87 miyon Dollar. Dicon PMEC di Mike de Meza tabata haya tur e contractonan lucrativo? Kisas e righthandnan aki tabata fix tur cos pa Mike? Pueblo mester siña conoce kende Mike de Meza en persona ta di berdad! Pues vision di Mike Eman y Mike de Meza y partido AVP ta pa endeuda pueblo bay goal y anda den multimiyonarionan so pa nan yena nan cartera na tur sorto di forma.
Curashi of cuero di cara?
Recientemente algun luna pasa e Board nobo di Citgo a splica un delegacion di Aruba durante un meeting na Miami cu alrededor di 181 miyon dollar tambe a disparce cual tabata destina pa e proyecto Citgo Aruba. Pues aki no ta papia di 10 florin pero di masha hopi placa. Parlamentario Endy Croes ta reta Mike de Meza bin dilanti y cuminsa splica pueblo ken e dos personanan aki ta y kico su relacion cu nan tabata ta den dicho proyectonan. Pues awor net Mike de Meza kier cuestiona Minister Presidente riba Citgo? Sea ta curashi of sea ta cuero di cara. Parlamentario Croes ta bisa di curashi no a keda nan nada, pues mester por ta cu e hendenan aki a perde gevoel y cuero di cara total. Un ex minister cu ta esun originalmente culpabel pa e desaster financiero y e Mega Debe, a bende Lotto pa prijs di baca flaco cu e Canadesnan, a desgracia Aruba cu un contracto “chimbo” cu Citgo, a Hedge WEB costando e pueblo aki casi 300 miyon florin y ainda ta cobrando salario como Parlamentario sin ta presenta na trabao no por tin moralidad of dignidad? Nos ta keda pendiente pa Mike de Meza su reaccion y spera cu e por ta sincero cu pueblo, por lo menos un biaha den su bida, Croes ta termina bisando.
